‘Gawai Muhibah Perbatasan’ entara Sarawak enggau Kalimantan dikena ngempitka pemereti enggau penyerakup, ku Riot
MERATIKA PENERANG: Riot (dua ari kiba) beratika penerang ba skrin sepengudah iya bejadika logo baru JKKK Kpg Entubuh, Tebedu lalu pia mega bejadika Titi Mit mansa umai ba pengerami nya.
TEBEDU: Kampung Entubuh, Tebedu malam kemari bisi nerima penatai raban tuai sereta mensia mayuh ari Kampung Sontas enggau Kampung Simangit, Entikong ba siti pengerami ‘Gawai Muhibah Perbatasan’.
Urung 300 iku raban ari Entikong tu datai nemuai ngagai Kpg Entubuh lalu betuaika Agarto (pengari Pak Chamat iya nya Pemesai Pelilih Mit) begulai enggau mensia mayuh ba pengerami makai lemai ba rumah panjai nya.
Sapit Menteri Luar Malaysia, Datuk Richard Riot anak Jaem nyadi temuai ti pemadu dipebasaka nyambut penatai raban nya ba pengerami ke diintu ninting taun.
Lebuhka bejaku ba pengerami nya, Riot madahka kaul entara tuai pemegai menua (menteri) ari genap 10 negara Asia Tenggara chukup manah.
“Kaul entara raban menteri menua Asia Tenggara chukup manah nyentukka kami dikumbai bansa Asia Tenggara lebuh ke nemuai ngagai menua bukai.
“Reti nya tadi penyerakup entara 10 bengkah menua Asia Tenggara udah nyadi ba renggat ti tinggi iya nya raban menteri ti ngarika genap menua udah meretika peneka sereta adat siti-siti menua,” ku iya.
Iya mega madahka, penyerakup meh pekara ti nentuka pengelikun, pemansang, pengelantang enggau pengeraja genap bengkah menua.
“Penyerakup ba renggat genturung pendiau tauka rumah panjai, pelilih menua, nengeri enggau menua deka nentuka pemujur siti-siti menua enti kitai beserakup kitai enda ulih diseraraka sengapa.
“Rantau Asia Tenggara ti diarika 10 bengkah menua sereta mega dikembuan urung 700 juta iku mensia deka nyadi siti menua ti chukup likun berindik ari pengawa pemansang ke digaga nengah atur ti chukup lantang,” ku iya.
10 bengkah menua Asia Tenggara iya nya Malaysia, Brunei, Singapura, Thailand, Indonesia,Laos, Cambodia. Myanmar, Filipina enggau Vietnam.
Riot madahka nuju tuan 2015, 10 bengkah menua tu deka nyapai juluk ati nyadi siti menua ti ngembuan siti tampai, siti kelai, sereta siti bansa ti dikumbai bansa Asean.
Ba pengerami nya mega, Riot ngelalu penatai raban ari Entikong, Kalimantan lalu mansutka jaku ti madahka kaul ti chukup manah seruran dikembuan mensia mayuh ba genturung pendiau Tebedu enggau raban ari menua sepiak,
“Kaul kitai enggau raban ari Entikong sigi seruran manah lalu tu meh tanda penyerakup ti udah nyadi ba pengidup mensia mayuh ba genturung pendiau Tebedu taja pan enda sama menua tang kitai seruran ngingat ka penatai kitai sigi sebaka,” ku iya.
Malam nya mega, Riot udah bejadika Titi (Jematan mit) pemanjai 68 meter mansa umai lalu pia mega bejadika logo baru Komiti Pemansang enggau Pengelikun Genturung Pendiau (JKKK) Kpg Entebuh.
Sama bisi datai ba pengerami nya Pemesai Opis Pelilih Mit Serian Sinde Muling, Sapit Pemesai Opis Pelajar Serian Yunus Apok enggau orang bukai ari genturung pendiau ke semak.