KUCHING: Raban pengarang berita dilalau ngambika mansutka mayuh agi berita senentang pengawa nulung orang ke enda bidik pendiau awakka ulih muka runding mensia mayuh ke bukai ti bedau kala besaup tauka meri bantu ngagai raban nya.
NERIMA PEMERI: Chan (kanan) enggau Yusuff (kiba) sama bela nerima pemeri ba atas panggau maya pengerami nya.
Nitihka jaku ari Sapit Kepala Menteri Datuk Patinggi Tan Sri Dr George Chan, karang berita ti bisi kaul enggau pengawa ngintu pengelantang pendiau tau agi dibantaika ari berita senentang penusah perang tauka pengawa jai ke bukai.
“Kitai patut ngayanka mayuh agi berita senentang pengawa ngintu pengelantang pendiau orang ke enda bidik lansik laban nya ulih muka runding orang bukai lalu ulih mai sama besaup meri bantu.
“Bisi siti cherita ti ngenang siku orang sakit ti begunaka pemeri buah pinggang ari mensia mayuh tang enggau enda disadang bisi agi orang sakit bukai ti lebih begunaka buah pinggang nya ari iya, ti ngujungka iya meri awak ngagai orang sakit nya nerima dulu lalu iya nganti pemeri ti bukai….cherita ke baka tu meh patut diayanka suah agi,” ku iya.
Chan mansutka jaku nya ba Pengerami Makai Lemai Kapet Merah ti diatur ba Palan Konvensen Borneo Kuching (BCCK) malam ensanus.
Pengerami makai lemai nya diatur Gerempung Pengelantang Pendiau Rama Sarawak (SWCS)
Chan mega madahka rayat Sarawak sigi seruran bejalaika tanggung pengawa meri bantu ngagai orang ke enda bidik lansik.
“Nengeri Sarawak iya nya siti palan pendiau ti likun endur mensia mayuh bejalaika pengidup enggau lantang lalu orang ke enda bidik lansik seruran dibantu nengah mayuh macham chara ngambika sida iya ulih ngasaika pengidup ti menyana baka orang bukai,” ku iya.
Iya mega ngelalau mensia mayuh sama bela besaup meri bantu taja pan enda mayuh tang nya udah chukup ngelantang ka ati orang ke enda bidik tu tadi.
Lebuhka bejaku senentang pengawa ngintu pengelantang pendiau, Chan meri basa sereta puji ngagai pengawa ti digaga SWCS ti dibetuaika Datu Yusuff Hanifah ke udah nyadi Presiden gerempung nya lalu udah ngumpul mayuh duit.
Dulu agi ari nya, Yusuff ke bejaku madahka pengerami malam nya diatur ngambika ulih ngumpul duit dikena bejalaika Palan ‘Pemulihan Berasaskan Komuniti’ (CBR) ba Jalai Ong Tiang Swee.
“Palan CBR begunaka duit urung RM200,000 kena melanja pengawa berubat ninting taun lalu bisi 220 iku nembiak benung diperatika ba palan nya,”ku Yusuff.
Iya mega madahka, gerempung iya udah mujur nyual 100 iti meja ngagai raban koporat ti bisi ngembuan penyiru ati lalu pia mega iya meri jaku puji ngagai orang bukai ke bisi datai.
Pemeri ti pemadu besai (platinium) ba malam nya datai ari Kenshido International nengah mata duit penyampau RM100,000 lalu ditangkanka Motorkon Sdn Bhd ba penyampau RM30,000 sereta Ibraco Sdn Bhd RM20,000.
Entara gerempung tauka kompeni bukai ti bisi meri bantu iya nya AMP Radio Networks ti udah meri bantu RM50,000 nengah chara ngayanka pengawa nya berengkah ari 12 Januari tu tadi.
Kelimpah ari AMP Radio Networks, media bukai ti sama bela bisi meri bantu iya nya Borneo Post, Utusan Borneo, See Hua Daily News, Sin Chew Daily News enggau Star Publications.