UCSI S’wak palan keterubah ngemeranka pelajar hospitaliti enggau dagang temuai

0

KUCHING: Universiti UCSI Sarawak palan pelajar tinggi keterubah dipilih endur ngelancharka sereta bejalaika ‘pilot project’ kluster pelajar keterubah dalam bidang Hospitaliti enggau Dagang Temuai.

Tu setipak enggau menua Sarawak ngembuan penyelai enggau pemanah kelebih agi dalam hospitaliti enggau dagang temuai ke nyengkaum adat sereta main asal ari mayuh pupu bansa.

Menteri Pelajar Tinggi Malaysia Datuk Seri Mohamad Khaled Nordin dalam aum pengarang berita sepengudah bejadika’Education New Key Economic Area (NKEA) Entery Point Project #10’ (EPP10) madahka sektor pelajar ulih mantu ngemujurka sektor dagang temuai sereta nyungkakka ekonomi menua nengah NKEA.

Nengah Educataion NKEA EPP10 menua tu ulih nempa mayuh agi nembiak ke ngembuan pengelandik, bepenemu sereta bepelajar tinggi, ku iya.

“Kitai ukai semina deka nempa pemayuh nembiak ti ngembuan pelajar tu tang deka ngadaka nembiak tauka pengereja pengawa ke bekualiti, bepenemu enggau bepengelandik tinggi. Laban enti kitai mujur nempa nembiak baka tu kitai ulih nyungkakka sektor dagang temuai menua,” ku iya.

Penyungkak sektor dagang temuai mega bepanggai ngagai pemujur kitai nempa modal mensia, ku iya.

Universiti UCSI ku Khaled sebengkah ari palan pelajar tinggi ti nyendiaka mayuh bengkah bidang pematih kena nempa modal mensia nitihka peminta dalam industri sereta setipak enggau pemujur sektor pelajar.

Nambahka nya raban UCSI numbuhka tiga hotel betikas lima bintang iya nya ba Kuching, Kuala Lumpur enggau Bandar Springhill.

Iya madahka, nembiak ke ngambi pelajar hospitaliti enggau dagang temuai ba Universiti UCSI deka nerima latih ba tiga bengkah hotel ti udah digaga.

“Kitai meda industri dagang temuai menua tu niki ninting taun, tang pengereja pengawa, bilik hotel ti bekualiti bedau chukup.

“Juluk ati Universiti UCSI deka nempa 15,000 iku nembiak ninting taun nyentukka taun 2015, enggau 50,000 ninting taun ngagai taun 2020.

“Reti nya nembiak ke belajar dalam bidang tu ulih belatih ba hotel universiti UCSI tu endur ngiri pengelandik enggau bepenemu tinggi, ari tu rayat kitai deka teulihka penatai pemisi ke tinggi,” ku iya.

Nitihku penerang Khaled, Kluster Pelajar tu nyengkaum Islamic Banking & Finanace, Advance Engineering enggau Sains Kesihatan, kelimpah ari kluster Hospitaliti enggau Dagang Temuai.

Bisi datai ba pengawa nya Menteri Muda Dagang Temuai Datuk Talib Zulpilip, Chairman UCSI Group Dato Peter Ng enggau pemesai ke bukai.