MIRI: Taja pan maya pengawa bepilih ba menua tu apin ditemu, tang pelilih Miri mengkang ngerembai maju dalam kandang lima taun ti deka datai bepelasarka pemanah pengawa ti udah dikereja perintah Barisan Nasional ngelama tu.
Sapit Kepala Menteri, Tan Sri Dr. George Chan Hong Nam bisi endar pengarap ati bandaraya Miri deka majak ngerembai maju nengah pengawa nengkebang sekeda bidang baru.
“Kitai deka meda ubah pemansang ti balat dalam kandang lima taun ti deka datai tu ukai semina nengkebang baru dalam industri minyak enggau gas tang Miri deka ngerembai nyadi hab palan pelajar ti tebilang,” ku iya apin lama ti udah.
Chan ke nyadi Menteri Pemansang Industri Sarawak bisi endar pengarap ati mensia mayuh ari pupu raban bansa ba Miri ulijh ngemujurka juluk nyadika menua Miri ngerembai maju dalam kandang nya.
“Mensia mayuh ba Miri udah bekerejasama pengelama lebih 20 taun sereta mali menua Miri nyadi bandaraya dagang temuai sereta nyadika kelai ngagai kitai majak mansang dalam kandang lima taun ti deka datai tu,” ku iya.
Nambahka nya, batang penemu 1Malaysia ti ditengkebang Menteri Besai Datuk Seri Najib Tun Razak udah meri peluang ngagai mensia mayuh ba Miri ngemansangka bidang ti ulih nguntungka semua.
Ku Chan baru, taja pan bisi bida ari segi penemu politik tauka pekara bukai, tang batang penemu 1Malaysia ti dikemeranka rayat ari pupu raban bansa ba Miri deka nya siti ari pekara ngemansangka nengeri minyak nya.
“Perintah meri awak ti sebaka ngagai rayat ditu ngambika sida ulih nengkebang baru dalam industri gas enggau minyak, rama tauka pelajar kena nentuka Miri bandaraya maju,” ku iya.
Tambah mega, bidang pelajar antara bidang ti patut dipunka ditu taja pan begunaka perengkaguna ti chukup ngambi pulaika pengelantang nembiak ti belajar dia sekalika ari menua tu empu tauka menua luar.