Pengawa bepilih: Raban bansa Cina ulih meri pemutus ke manah

0

KUCHING: Parti Sa’ati Rayat Sarawak (SUPP) bepengarap besai ngagai raban bansa Cina meri sukung ke manah ba pengawa bepilih menua ti deka datai beduduk ari ngembuan ubah baru ke manah dalam parti.

Sapit Kepala Menteri ke mega nyadi Presiden SUPP, Datuk Patinggi Tan Sri Dr George Chan madahka iya andal bendar bansa Cina berubah sereta meri sukung ngagai parti.

Nambahka nya seraban 300 iku orang profesional sereta nembiak rebak baru diatu ngedutka pemereti ati enggau rayat ba genap serak.

“Aku meda ubah laban sida nemu kami (SUPP) amat bebendar deka berubah. Aku meda ubah dalam runding pasal kami.

“Nya kebuah aku ngarapka nembiak rebak baru (300 iku) nerangka ngagai rayat, kami (SUPP) bebendar deka berubah,” ku iya lebuh ditanya sekalika bansa Cina ulih meri pengarap ngagai parti.

Iya masutka penerang nya dalam sebengkah aum pengarang berita ke diatur ba Bilik VVIP, Padang Bilun Entarabansa Kuching (LTAK) ditu, kemari.

Nitihka Dr Chan, diatu endang mayuh orang ti pandai sereta bepengelandik tang ukai reti semua ulih ngempitka kaul enggau rayat ba genap serak, laban mayuh raban pedaja tauka penyual, deriba teksi ke mega tau digelar profesional ba pengawa sida.

“Sida (300 iku orang profesional) deka dilatih chara bekempit sereta begulai enggau rayat tauka pengundi,” ku iya madahka pengarap ati ngagai sida tu ulih bebendar meri penerang ke patut ngagai rayat.

Lebuh dipinta meri penemu pasal parti penyakal di Miri deka milih bansa Cina ngarika penuduk PAS, iya madahka nya berita ke matak ati.

Tang ku iya sida patut nemu beratika penemu tauka main sida, laban sebedau tu enda setujuka bansa Cina nyadi Sapit Menteri Besai ku iya.

Tambah mega ku iya, rayat kitai lebih pandai berundingka bagi perintah ke ngereja pengawa betul.

Dr Chan mega dipinta meri penemu senentang penyarut entara parti penyakal, iya madahka diri nadai kaul enggau parti nya.

“Bepanggai ba sida (parti), aku ukai ari penyakal bakani aku ulih nemu,” ku iya ke nyadi Kaban Kunsil Nengeri (ADUN) Piasau.