SIBU: Rindu enggau pengawa nyadi sedadu tasik, urung 100 iku mensia mayuh bisi datai ngujika nasit ngenataika diri ba pengawa interbiu tebuka nyadi Sedadu Tasik Menua Malaysia (TLDM) ba SMK Bandar Sibu, kemari.
Nitihku pengari ari kem Sedadu Tasik, Leftenan Khairunislah Ahmad ari Opis Menteri Nyaga Menua Malaysia, interbiu keterubah berengkah diatur ba Miri kena 10 Mac ke udah lalu.
“Pengawa interbiu tebuka renggat kedua diatur ba Bintulu, kenaka hari Satu lalu ba Sibu palan ketiga pengawa nya dipejalaika ba siri 206/2011,” ku iya bejaku ngagai pengarang berita.
Ku iya nambahka, pengawa milih nyadi sedadu tasik ke penudi deka diatur ba Kuching kenaka bulan September tu ila.
“Naka kediatu, pengawa ngiga raban nyadi sedadu tasik mujur diatur lalu raban kami bisi nerima sambut ke manah ari raban peminta.
“Orang ke minta patut diuji ari segi fizikal, mental enggau meresa pengerai tubuh ke diatur sepemanjai interbiu sari nya diatur,” ku iya.
Ngenang interbiu tebuka nya, Khairunislah madahka mega bisi nerima peminta ari raban bansa Cina ke diatur ba Miri apin lama tu tadi.
“Ketegal ke udah kelalu tuai, peminta iya enda mujur. Atur milih raban TLDM udah ditetapka iya nya meseti beumur 18 nyentukka 23 taun sereta ngembuan pemerat enda kurang ari 49 kilogram bagi ke lelaki sereta 40.5 kg bagi ke indu,” ku iya nerangka baru.
Atur ke bukai iya nya, iya nya ngembuanpeninggi enda kurang ari 163 sentimeter (SM) ba ke lelaki sereta 160 sm bagi ke indu, pemesai dada (enda nyintak seput) 76 sm sereta 81 sm maya nyintak seput, BMI 19.0 nyentukka 26.9 (lelaki) enggau 18 nyentukka 23.0 (indu).
Ari segi pengerai, peminta patut ngerai tubuh isi, enda rabun chura enggau enda timpang pendiau. Raban nya mega patut ngembuan Sijil Pelajaran Malaysia (SPM) ambis nadai kepujian ba matapelajar Bahasa Melayu ari sekula bantu perintah.
Pengawa ngatur interbiu tebuka bagi menua Kuching kena 19 Mac tu (hari Enam).