SIBU: Gerempung Luya Sarawak (PPS) Sitak Sibu endang udah lama meri servis penerang senentang pengawa atur undang-undang enggau nyendiaka servis mantu enggau enda bebayar kenyau ari taun 2007 nengah program Klinik Bantuan Guaman.
Chairman PPS Sibu, George Lim madah, program tu sebengkah ari inisiatif PPS ti ngembuan tuju deka mantu mensia mayuh iya ke kurang penatai pemisi.
“Yayasan Bantuan Guaman Kebangsaan (YBGK) enggau Biro Bantuan Guaman (BBG) udah bisi bantu ari perintah, lalu Klinik Bantuan Guaman dispunsa Majlis Peguam Sarawak enggau bala raban kebukai.
“Luya ti ngambi sebengkah awak ba program enda bebayar tu deka meri lalau senentang enggau undang-undang sereta enda ngarika sapa-sapa ba kut,” pia ku iya madah ngagai pengarang berita, kemari.
Ba taun 2011 ku Lim, PPS mutus deka nyeruri program tu nyengkaum mayuh agi narit penatai bala raban lawyer ke enda dibayar gaji ngambika ulih nambahka agi awak program sereta disadung ngagai mayuh endur.
Klinik Bantuan Guaman 2011 ba Sibu deka dipejadika akim Kut Besai Sibu, Yew Jen Kie, kena 23 Mac tu, pukul 12 tengah hari di Hotel Paramount.
Klinik tu deka dibuka ninting hari Enam berengkah 9 April tu, ari pukul 9 ngagai 11 pagi ba Kut Sibu lalu diatur kena meri penerang senentang pengawa atur undang-undang baka ba pengawa nikah, sarak, tanah, kes bebadi tauka ngemediska diri, kereja, industri enggau mayuh agi bengkah atur bukai.
“Ba tu, bala ke ngena servis tu deka mendingka licha nitihka tuju program ke dipilh.
“Ukai semina licha, servis pengawa atur undang-undang enggau nyendiaka servis mantu deka diatur sepengudah tembu licha enggau chara enda bebayar,” pia ku Lim nambahka baru.
Penerang silik tau ditanya ngagai Nora ba lumor 084-343411.