KUALA LUMPUR: Parti Keadilan Rakyat (PKR) mantaika lis pemutus nama chalun pengawa bepilih besai Sarawak ba aum kunsil besai parti, kena hari Minggu ti deka datai tu, ku Sapit Presiden PKR, Azmin Ali, kemari.
Taja pia ku iya, penyampau penuduk ti deka endur sida bediri bepanggai ba pemutus runding enggau Parti Kebangsaan Sarawak (SNAP) hari Empat ti deka datai tu taja pan sebedau tu PKR bisi madahka diri deka bediri ba 52 ari 71 iti penuduk Kunsil Nengeri (DUN) Sarawak.
“Aku udah betemu enggau ketuai sida (ketuai SNAP) ensanus lalu kemari sida udah ngatur kuing sereta penuduk ti deka endur sida bediri.
“Aku betemu enggau Penyanding Penemu SNAP Datuk Seri Daniel Tajem kena hari Minggu tu tadi sereta Sekretari Besai sida Stanley Jugol kemari,” ku iya bejaku ngagai Bernama.
Taja pia, iya enggai nerangka enggau silik pemutus senentang dua bengkah aum enggau SNAP nya, semina madahka nadai penyerekang penemu bekaul enggau pengawa bebagika penuduk ba raban penyakal Sarawak baka ke diripot ba media sebedau tu.
SNAP seraban ari penyakal PKR-DAP-PAS ba Sarawak. — Bernama