Rayat ba mengeri patut mulaika diri kena napi penumbuh dagang enggau pengawa puang ba menua tu
PEMANCA SII TOH PING
PEMANCA SAMUEL LAWEN
PEMANSANG ke majak ngerembai ba sitak Simanggang udah ngubah pengidup rayat betanam betupi ba menua pesisir nyerumba pemujur atur ba kandang mengeri ti nyendia peluang dagang sereta pengawa puang ngagai rayat pelilih menua tu.
“Aku nemu nadai utai bukai ulih ngangkatka pengidup rayat kelimpah ari pengawa betanam betupi. Nya alai, raban nembiak ngiga pengawa ngagai mengeri ti ulih meri penatai pemisi ke tinggi agi,” ku Pemancha Samuel Lawen.
Bekaul enggau pengawa rebak baru mindah ngiga pengidup ba mengeri, iya ngarapka raban nya ulih mulaika diri lalu ngentap ba menua pesisir laban mayuh agi pemansang deka diatur perintah ba menua tu ba maya ti deka datai.
UDAH LAMA: Sebagi ari kedai-kedai lama di bandar Sri Aman.
TAMBAHKA BARU: Benak Panoramic Garden di tebing Sungai Batang Lupar.
HOTEL BARU: Projek palan dagang enggau hotel 10 ringkat siti projek besai ba mengeri Sri Aman.
KOMPLEKS LUMBA ENGGAU MAIN: Kompleks Lumba enggau Main Tetutup Sri Aman.
“Ba Simanggang, kami ngembuan beratus ribu hektar tanah ke ulih endur muka kebun kepala sawit baka ba Batu Lintang, Pakit, Merindun enggau Lubuk Antu kelimpah ari nelebaka diri ba pengawa industri mit,” ku iya.
Ba sitak nya mega mayuh palan endur bedagang udah disediaka perintah ti ulih narit mayuh agi raban orang dagang ari menua luar bejalaika pengawa dagang sida.
Bekenang senentang pemansang jemah ila, Samuel andal ati projek jalai alun ti nyambung terus ari Betong ngagai Simanggang ulih dipejalaika perintah.
“Jalai nya ila ulih meri penguntung ngagai mensia mayuh ari sukut ekonomi kena ngangkatka penatai pemisi sida ila,” ku iya.
Kelimpah ari nya mega, Pemancha Sii Toh Ping madahka menua Simanggang deka bulih mayuh pemansang jemah ila baka ti dilanggur institut pelajar tinggi Universiti Teknologi MARA (UiTM) enggau politeknik.
Pia mega, ba renggat ke terubah perintah merambu numbuh siti palan dagang 100 pintu kedai ngambika ulih ngangkatka agi ekonomi enggau pengawa industri ba menua tu.
Ukai semina nya aja, hotel 10 ringkat mega deka digaga ngambika ulih napi temuai maya pengerami besai baka Pesta Benak sereta ke bukai.
Sepital Besai baru Sri Aman mega udah dalam perambu perintah kena nampung pemayuh raban orang sakit ba menua Sri Aman.
“Nya alai, aku arapka rayat di menua tu nyukung projek pemansang ke deka diatur di menua tu ngambi pulaika penyenang enggau penguntung ngagai sida dudi ila,” ku Datuk Francis Harden Hollis, pemangku sitak N.27 Simanggang ke lalu nyadi Menteri Muda Pemansang Tanah Sarawak.