BN enda bebulaka semaya ngagai rayat

0

SIMOI PERI

SRI AMAN: Kaban Kunsil Nengeri (ADUN) Lingga, Hajah Simoi Peri madahka perintah Barisan Nasional (BN) nadai kala bebulaka rayat tang semua semaya perintah BN ngelama tu terus diberi.

Ku iya, perintah BN bepegai ba polisi ngemansang sereta ngintu nasit rayat lalu ukai bebulaka rayat, lalu semua pekara tu ti nyadi ngelingi kitai datai ari pemansang ti dibai perintah BN.

“Kitai enggai dikumbai sida semina bejaku puang aja, nya alai semua pekara ti udah disemayaka ngagai rayat ngelama tu deka diberi magang,” ku iya lebuh ti bejaku ba Pengerami Makai Selamat sereta Terima Kasih beserimbai enggau pemujur iya udah menang ba sitak Lingga ti diatur Parti Pesaka Bumiputera Bersatu (PBB) Lingga ba Dewan Sekula Primari (SK) Meludam enda jauh ari Betong malam esanus.

Ku iya, pemujur BN menang ba sitak Lingga dalam pengawa bepilih menua tu tadi, mandangka rayat ba sitak nya mengkang begunaka pemansang ari perintah BN sereta ngenggaika penyakal ti semina nemu bejaku puang aja.

“Diatu kitai sama nemu penatai penyakal ngagai Lingga ba pengawa bepilih besai apin lama ti udah enda diterima rayat ba sitak tu, laban sida nemu penyakal semina nemu bemainka hak rayat sereta ngemelika sida aja,” ku iya baru.

Ba pengerami nya, Simoi meri besai terima kasih ngagai bala pengundi kelebih agi ba sitak Lingga laban mengkang arapka iya nyadi pengari rayat ba sitak nya dalam kandang lima taun agi.

“Aku besemaya enggau bala pengundi ba sitak Lingga tu sereta chakah agi gawa ngemansangka rayat ba sitak tu sereta deka mai mayuh agi pemansang ke bukai kena ngelantangka rayat ditu.

“Beduduk ari nya, aku beguna amatka sukung ari rayat semua ngambika terus bekerejasama enggau kitai ngereja pemansang ditu,” ku iya.

Ba pengawa bepilih besai menua kenaka 16 haribulan April tu tadi, Simoi tebulihka 3,652 undi ngalahka chalun PKR Abang Ahmad Arabi Abang Bolhassan ti semina tebulihka 1,146 undi lalu chalun SNAP, Abang Othman Abang Gom semina tebulihka 359 iti undi aja.

Sama bisi ngulu pengerami nya, Pemesai Pengatur Pengawa Sarawak Pelilih Mit Menua Meludam, Baijury Dzulhizam, Pemesai Opis Hal Ehwal Khas (JASA) Sarawak DUN Lingga, Sulaiman Amut, Pengulu Haji Awang Karim bin Awang Amit, Kaunselor Mas Shamsiah Haji Maslem, raban orang g awa perintah, bala ketuai raban bansa sereta ranting-ranting Parti PBB ke bukai.

Ba Pengerami nya, iya nyuaka geran ari perintah ngagai Komiti Pemansang enggau Pengelikun Genturung Pendiau (JKKK) Meludam, sereta disempulang enggau pengawa belagu karaoke sereta betanda poco-poco ari mensia mayuh ba Meludam.