Orang dagang Sarawak patut landik

0

Ngedut kaul enggau raban menua tasik ngambika ngerembai ngelui tikas antarabansa

BARU: ‘Alpha-Lipid Colostrum-Sleep Time’ produk baru kompeni NZ New Image Sdn Bhd ti dipelakuka ba Sarawak.

KUCHING: Orang dagang ba menua tu patut landik ngedut kaul enggau orang bukai lebih agi raban orang menua luar enti dekaka pengawa dagang majak ngerembai sereta maju nyengkaum bedagangka barang pengerai.

Sapit Menteri Kereja Raya Malaysia enggau Kaban Parlimen Stampin, Datuk Yong Kong Seng madahka dunya ti majak moden sereta mayuh bengkah perengka teknologi orang dagang ulih bedagang ngelui garis antarabansa.

“Nengah teknologi moden, kitai Sarawak ulih ngerembai sereta ngedut kaul dagang enggau menua bukai ti ngembuan rayat ke mayuh baka, Amerika, India, Indonesia, Taiwan sereta ke bukai, ti dipelabaka bisi peminta tinggi.

“Kelimpah ari nya ulih nambahka tikas penatai pemisi sereta ngumpul mayuh kaban dagang ti ulih mantu ngerembaika produk tauka barang dagang,” ku iya.

Yong bejaku lebuh bejadika opis enggau produk baru NZ New Image Sdn Bhd ba opis baru di Jalai Penrissen ditu, kemari.

Produk pemadu baru ari kompeni tu iya nya ‘Alpha-Lipid Colostrum-Sleep Time’ lalu Sarawak palan ti keterubah endur ngelakuka produk tu.

Ba Malaysia, Kuching, Sarawak palan ti kedua numbuhka opis NZ New Image Sdn Bhd dibuka sepengudah Kuala Lumpur.

Kelimpah ari Malaysia, produk ari NZ New Image tu udah dikelala sereta laku ba Taiwan.

“Produk tu chukup manahka pengerai kitai, ulih nambahka pemanah kualiti pengerai enggau pengidup rayat Sarawak, Malaysia sereta serata dunya,” ku iya madahka pemanah produk nya.

Nitihk Vice Presiden Asia Pacific,a N.H. Chua dalam aum pengarang berita, NZ New Image Sdn Bhd kompeni ti keterubah nyual produk kolostrum, lalu pengeluar pemadu besai ba dunya (75 peratus) sereta bisi kilang kediri empu.

Nambahka nya tu sebengkah produk unik ti ketrubah ba dunya sereta enda ulih ditunda orang bukai.

Produk ‘Alpha-Lipid Colostrum-Sleep Time’ ari New Zealand tu asil ari tusu chapi ti bekualiti, ku Chua.

Ku iya, produk Sleep Time tu ulih ngasuh tinduk jenak, lalu tau diirup semua orang nyengkaum ke bisi penanggul tinduk.

“Keterubah iya, palan tu kena kami ngelatih orang ti ngembuan pengerindu masuk produk tu ngambika sida ulih nerang sereta nyual produk tu ngagai orang bukai, kelimpah ngujika dulu pemanah produk tu ba diri empu.

“Enti peminta rayat ditu tinggi, dipelabaka dudi ari ila opis baru deka dibuka ba mengeri bukai dalam Sarawak,” ku iya seraya madahka diatu semina bepuluh iku aja udah nyadi kaban.