KUCHING: Padawan Municipal Council (MPP) sekali agi deka ngatur Padawan Fair 2011 ba Batu Kawah New Township berengkah ari 25 Jun 2011 nyentukka 17 July 2011.
Chairman MPP Lo Khere Chiang mansutka penerang tu ba aum pengarang berita sepengudah ngulu aum opis kunsil nya ditu, kemari.
Sekali tu pengerami nya besuluka rambai jaku “Kenali MPP, Sayangi MPP” ke nyadi sebengkah program ke bisi diselitka ninting taun ba pengerami ngintu ‘Padawan Fest 2011’,” ku iya.
‘Padawan Fair’ taun tu deka nyendiakka urung 40 buah bansal endur bejual mayuh macham utai diempa, kelimpah ari bejual ke perengka bukai sereta pia mega mayuh macham main ti merindangka ati sereta panggau pemerindang bisi mega dipandangka ngagai mensia mayuh, tandu iya.
Lo mega madahka tu meh ke- 15 kali ‘Padawan Fest’ udah diatur MPP lalu entara program bukai ke bisi diatur taun tu iya nya Pekit Main Bol Liga MPP, Padawan Raft Safari, BHR Padawan Nature Challenge enggau Lantern Festival.
‘Padawan Fair’ tu ila deka dipenyadika Sapit Menteri Kereja Malaysia Dato Yong Khoon Seng kenaka 2 July 2011 (hari Enam) pukul 7:30 lemai.
Iya mega madahka ba pengerami Padawan Fest ungkup taun 2012 ila, Telaga Ai dipelaba nyadi sebengkah program ke deka dipasukka dalam kalenda MPP alai main lumba ai enggau program bukai ba kandang endur nya deka diatur.
“Telaga Ai ngembuan sungai ti beresi sereta manah, kitai engka deka nyengkaum menua nya nyadi sebengkah program ba Padawan Fest ba taun ke deka datai,” ku iya.
Sebengkah agi program ke pemadu manah diatur MPP maya ‘Padawan Fest’ tu ila iya nya Borneo Highlands Resort (BHR) Padawan Nature Challenge 2011 alai main lumba basikal enggau pengawa bejalai neresa kampung.
“BHR Padawan Nature Challlenge 2011 deka diatur ba Kpg Annah Rais enggau Borneo Highlands Resort kenaka 3 July 2011.
“Mensia mayuh dilalau sama bela bepekit ba program tu lalu entara tuju program tu iya nya deka ngelakuka agi dagang temuai kelimpah ari ngemeranka gaya pengidup ke regas,” ku Lo.
Embun Kiara Sdn Bhd nyadi kompeni ke megai tanggung pengawa ngatur palan bejual ba Padawan Fair ke diatur ba Batu Kawah New Township lalu orang dagang ke deka nyuwa bangsal bejual dia tau telefon ngagai lumur 013-8026857.
Nitihka penerang ari Lo, panggau pemerindang deka diatur ba palan nya lalu mensia mayuh deka diperindang sekeda penyanyi ari menua tu enggau semenanjung.
Sama bisi datai ba aum pengarang berita nya Chairman Pengatur Pengawa Cr. Richard Kian Hua Mudeh, Menijer Besai Borneo Highlands Resort Loh Leh Ching sereta pengari ari kompeni Embun Kiara Sdn Bhd.