SUPP andal agi ngetanka penuduk Serian: Wong

0

KUCHING: Sapit Sekretari Besai Parti Sa’ati Rayat Sarawak (SUPP) Dato Sri Wong Soon Koh madah SUPP dipelaba agi ulih ngetanka penuduk parlimen Serian ba pengawa bepilih besai menua (PRU ke-13) tu ila.

Iya madah baka nya laban beratika sukung positif ari pupu bansa Dayak ba menua nya.

“Ba penemu aku, kerusi parlimen Serian ke ditan Kaban Parlimen (MP) kediatu, Datuk Richard Riot agi mengkang ulih ditanka iya nitihka pemutus rikod ke udah, tang 6 iti kerusi SUPP bukai ba nengeri…nya nyangka bisi pedis mimit tang kami tetap deka bebendar agi gawa menang kerusi ba nengeri kelebih agi ba endur ke mayuh raban bansa Cina diau,” ku iya madah lebuh dikerandau bala media ba opis iya ba Bangunan Baitulmal ditu, kemari.

Taja pia, ku Wong ti mega nyadi Menteri Rampa Menua enggau Pengerai Mensia Mayuh madah PRU ke-13 nyangka enda diatur dalam timpuh ke pandak tu laban mayuh pekara bukai ke patut dikerundingka chairman Barisan nasional (BN) ti mega nyadi Menteri Besai Datuk Seri Najib Tun Razak.

“Ba penemu aku, enti sema PRU ke-13 diatur taun tu tauka barang maya taun baru tu ila, tentu empat buah menua ke dipegai penyakal enda besetuju dipadamka Kunsil Nengeri (DUN) sida iya…Nya pan enti utai ku aku tu amat, nyangka enam bulan sebedau abis penggal taun 2013,” ku iya. Lebuh ditanya ngagai iya enti SUPP agi relevan tauka enda ba pupu bansa Cina, ku Wong: “Parti tu patut angkat baru, berubah, nusun baru parti sereta mai mayuh agi bala nembiak ti bepengelandik dalam parti.

Maya bepilih besai menua Sarawak 16 April tu tadi, SUPP semina menang ba enam ari 19 penuduk enggau empat ari penuduk nya ba sitak menua Dayak (Opar, Bengoh, Simanggang enggau Engkilili) lalu dua iti penuduk agi ba Senadin enggau Bawang Assan ke di ari iya empu.