Mensia mayuh landik milih ngambika enda tekenaka barang ti mar rega
SIBU: Mensia mayuh ti deka bebelika barang kena ngintu pengerami, dilalau ngambika manding rega sebedau ti mutuska penemu meli barang ti diguna sida dulu ngambika ulih meli barang enggau rega ke pemadu murah.
Sapit Direktor Opis Menteri Dagang Dalam Menua, Koperasi enggau Pekara Pemeli Barang (KPDNKK) Sarawak, Mohd Khalis Kasim madahka nyangka rega nya sama ba kedai mit, tang ia tau murah agi supermarket.
“Pesan ngagai kitai ke bebelika barang rambau pengerami tu, kami ngelalau ngambika manding rega dulu sebedau meli iya.
“Enti tetemuka endur rega murah agi, dia mih kita meli barang nya,” ku iya bejaku ngagai pengarang berita lebuh ti meresa rega barang sekat nyerumba pengerami Gawai Dayak ba Pasar Sentral ditu, ensanus.
Mohd Khalis disempulangka Sapit Pemesai Penerit Adat KPDNKK Sibu Templer Dasu sereta Inspektor Pengerai Kanan Opis Kunsil Sibu Chin Chee Ming.
Ku Mohd Khalis, taja pan perintah udah netapka rega sekat ungkup sekeda barang nyerumba musin pengerami tu, tang bisi mega rega ke diletakka orang dagang, kelebih agi ba supermarket murah agi.
Pekara tu manah ngagai pemeli kelebih agi sida ti deka ngintu Gawai enda lama agi.
Lebuh ti ngenang rega sekat ungkup barang ti dijual kena ngintu pengerami Gawai 2011, nya mungkur 12 bansa barang, lalu iya madahka bisi bida mimit ungkup rega barang sekat ba sekeda endur ke bukai.
“Taja pia rega barang nya enda kelalu mayuh bebida enti dibansi enggau ungkus kena berangkutka barang nya.
“Rega nya bepelasarka rega ke digelumuka ninting hari lalu ditetapka sepengudah berunding enggau orang ke nyadung sereta orang ke be tupi,” ku iya.
Kelimpah ari nya, Mohd Khalis muji raban orang ke nyadung sereta betupi ba menua tu tu laban udah meri kerejasama penuh ngagai opis menteri netapka harga barang sekat nyerumba musin pengerami.
“Nya alai lebuh kitai beratika pekara nya ba Sarawak, ambika chuntoh rega manuk enggau telu manuk enda ditikika enggau ngenyit ketegal bisi berita sebubu ngapa di madahka rega barang nya deka ditikika nyerumba musin pengerami tu.
“Pekara tu bebida ba menua Semenanjung Malaysia, kitai ninga rega manuk enggau telu manuk deka ditikika nyerumba musin pengerami,” ku iya serayaka ngelalau orang dagang bejualka barang nitihka rega barang ti udah ditetapka.
Iya mega bisi endar pengarap ati, rega ti udah ditetapka ungkup barang sekat sigi rega ti tau dititihka semua orang dagang ngambika enda nating orang ke bebeli barang.
12 bansa barang rega sekat ari baruh Skim Nyekat Rega Nyerumba Pengerami Ngintu Gawai 2011 nyengkaum manuk idup, manuk setindit, manuk super, manuk tuai mengkang idup, dagin chapi import, daging kerbau menua tu empu, dagin kambin biri-biri import agi betulang, telu manuk gred A, B enggau C sereta dagin babi.