Sunday, June 16

‘Gawai 1Malaysia’ album keterubah kompeni Pangau Buluh Pengerindu

0

ARTIS BARU: Edward Geli, artis baru PBP. Diatu album iya benung dijual ba pasar.

SIBU: Keterubah iya, Pangau Buluh Pengerindu (PBP) nengkebang album Hari Gawai taun tu.

Nitihku direktor PBP Embat Lala, album Gawai sida serak tu digaga enggau nama ‘Gawai 1Malaysia’ ti disempulang beberapa iku artis tebilang PBP.

“Artis ke dikelala mensia mayuh tu baka Hailey, Toddy, dua iku artis baru iya nya Lazarus enggau Baby Daisy, Masterpiece enggau aku empu.

“Taja pan baka nya, ba album Gawai keterubah tu bisi digaga nyelaie ari album Gawai ke bukai,” pia ku iya nerangka ngagai pengarang berita, apin lama tu tadi.

Ku iya nerangka, album tu ngundan semilan iti lagu ti sengaja digaga ungkup mensia mayuh enda milih tikas umur.

Nambahka nya ku Embat, video klip digaga ba Rumah Empi, Tanjong, Pakan enggau beberapa iti palan bukai ba Sibu enggau Sarikei.

“Kelimpah ari digaga enggau gaya Gawai, album tu mega bisi disempulang main enggau adat lama baka bebiau, ngerebahka ranyai, miring, ajat ngelaluka pengabang, main baka batak lampung, bebatis betis enggau mayuh main bukai.

“Tuju kami baka tu laban deka mai bala bukai kelebih agi sida ke nembiak ngelala main enggau adat asal kitai kelia,” ku iya nerangka.

Nyadi ku Embat, album tu diseruri sereta ditengkebang Harry Usup Umbar, Depha Masterpiece, Ayi Bakri, Toddy enggau iya empu. “Sekeda ari lagu bisi dalam album tu baka ‘Aihh Ahh (Selamat Hari Gawai)’, ‘Gawai 1Malaysia’ ‘Danji Di Hari Gawai’, ‘Segenda Pegari’, ‘Sunyi Begawai Nadai Ambai’, ‘Begawai Enggau Ambai’, ‘Selamat Hari Gawai’, ‘Indai Ku Ka Ehem’ enggau ‘Mansau Leka Padi’.

“Kitai melabaka lagu ‘Aihh Ahh (Selamat Hari Gawai)’ dibai Hailey, Toddy, Baby Daisy, Lazarus enggau aku empu, ‘Gawai 1Malaysia’ (Embat La La), ‘Mansau Leka Padi’ (Masterpiece) enggau ‘Indai Ku Ka Ehem’ (Baby Daisy) nyadi lagu hits,” ku iya nambahka baru.

Maya nimbal tanya pengarang berita nama kebuah baru diatu PBP ngaga album Gawai kenyau beberapa taun udah penumbuh studio nya, ku iya, baru diatu sida bisi ngembuan artis ti tau dikumbai engkeman dikena ngaga album Gawai.

Enggau nya mega, Embat madah, naka ke diatu album nya udah mujur dijual lebih 5,000 iti sepengudah beberapa hari udah dipansut. Iya berasai tekenyit ati meda penyampau nya, tang endang segi udah melaba ari dulu suba laban kenu ku iya, album tu ngembuan ‘pengering’ iya empu ari album Gawai bukai.

“Terima kasih ngagai bala peminat ti enda kala pungkang meri sukung ngagai kami ngelama tu,” pia ku iya nambahka baru. Kelimpah ari album Gawai tu, PBP mega bisi ngemansutka album ari artis baru iya nya Edward Geli berasal ari Batu Niah.

Album tu ditempa enggau juluk ‘Sebana Ati’ lalu bekenaka pengelama setaun setengah nembuka album nya.

“Sekeda ari lagu ke bisi dalam album tu baka ‘Joget Nyambut Taun Baru’, ‘Semina Nganta ke Tegalan’ enggau mayuh lagu ke bukai agi. “Semua lagu tu betiun Balada enggau Joget lalu video klip digaga ba sebelah Sibu ditu,” ku iya sambil madah album Edward diatu benung dijual ba pasar.

Berebak enggau tu mega, PBP meri Selamat Hari Gawai Dayak, Gayu Guru Gerai Nyamai ngagai semua bala peminat lagu Iban serata nengeri.