Palan bedaja ba garis entara menua Sarawak-Kalimantan tu majak dikerindu mensia mayuh
PENUH: Mensia mayuh besunsun ngiga barang ti dikingin ati ba Palan Bedaja Serikin.
BAU: Pasar Serikin ba garis entara menua Sarawak enggau Kalimantan, Indonesia tebilang kenyau ari penumbuh Palan Bansal Bedaja ba endur tu.
Suba orang ti datai ngagai endur tu semina sida ti diau bekelingi dia tauka ari Kuching aja.
Tang sekumbang apin lama ti udah, iya jauh amat berubah. Orang ti datai ngagai endur tu ukai semina ari serata Sarawak agi, tang orang ari Semenanjung mega sanggup datai ngagai Serikin laban tetarit ati ngagai palan bedaja ba endur tu.
“Aku ari Miri lalu pulai pemisi ke Kuching rambau Gawai Dayak tu, lalu peluang tu dikena kami sebilik datai ngagai Serikin bebelika barang,” ku Hamdan Sidik, 28, ti lalu madahka diri tiap kali pemisi ke Kuching sida sebelik sigi selalu datai ngagai Serikin.
Ba tinjau Utusan Borneo kemari, palan bedaja tu ti dibuka tumu pagi udah dipenuh mensia mayuh maya pukul 7 pagi.
Kerita ti besunsun nuju palan bedaja tu endang udah lama betusun ngiga penyangkai. Lalu pia mega mensia mayuh sigi udah belabuh menuhka palan bedaja ti bejualka mayuh macham barang ari pemakai, perengka rumah nyentukka gari.
Berebak enggau orang ti datai meli barang ngagai palan tu, dia bala orang ti bejual mega enggau naka ulih ngelakuka barang diri.
Ukai semina sida ti bejual barang pengelandik jari baka bangku, tikai, perengka rumah, dapur lalu enggau ke bukai bulih untung, tang orang ti bejual ari irup sama mega bulih ipak diri ari dagang sida.
Iman Bukhori, 37, nyual bakso (bansa pemakai ari Indonesia) sama bulih penguntung ari palan bedaja Serikin tu.
Ku iya, sebedau tu iya muka bansal dalam siti kedai pasar Serikin, tang udah ti ngasaika insur ba dagang iya nya lalu bejual ngena mutosikal ngelingi palan bedaja enggau pasar Serikin.
Ari ti diperatika surat berita tu sereta pemayuh mensia ti datai, dia sida ti bekaul enggau pemansang kandang Serikin kelebih agi palan bedaja patut endar mansutka penemu baru kena nyungkakka pemanah palan dagang ba endur tu.
Sida ukai semina tau ngubahka bansal ba palan bedaja nya, tang sida mega patut berunding muka siti palan ti tau endur orang bemalam ba menua nya.
Enti nyema hotel enda ulih dibuka ba menua tu, program homestay patut dipejalai ngambika bisi endur temuai ti bisi ati deka bemalam ngenduh diri empu.