Pemutus dewan mandangka semina 15 iku setuju tang 45 iku enda ngemendarka usul nya
ENDA PUAS ATI: Chong (tengah) benung dikerandau pemberita bekaul enggau usul iya enda diterima raban dewan.
KUCHING: Pemutus undi ba Aum Kunsil Nengeri kemari enda ngarika usul ke dibantaika Chong Chien Jen (DAP Kota Sentosa) ke deka ngenaka ukum ngagai Dr. Jerip Susil (BN-Bengoh) senentang jaku ke dipansutka iya ‘Lakia monkey’.
Speaker Kunsil Nengeri (DUN) Dato Sri Mohd Asfia Awang Nassar madah nitihka ‘Perintah Tetap 29(1)’, jaku ke bejaika bansa ba dalam Aum Kunsil enda dikemendarka”.
“Aku minta raban dewan ngundi sekalika usul dikenataika iya (Chong) diterima tauka enda.” ku Asfia.
Tang pemutus undi nya mandangka semina 15 raban dewan setuju lalu 45 iku enda ngemendarka usul nya.
Chong mantaika usul nya madahka Jerip ngelanggar Perintah Tetap 32 (10) (b) enggau (c) ketegal udah ngasuh rayat bansa Cina enggau Dayak sama bela enda puas ati.
Chong ba usul iya minta Dr. Jerip minta ampun ngagai rayat Sarawak senentang jaku iya ke ulih ngeruga pengelikun kaul.
Enti Jerip enggai minta ampun, iya nitihka Chong patut dibai bechara ngagai ‘Jawatankuasa Keistimewaan’.