Ayanka penyakah dalam dagang: Abdul Rahman

0

LIMBANG: Bala raban Rukun Tetangga (KRT) ba genap bengkah endur diau dipinta regas sereta berani agi masuk  bidang ekonomi sereta anang semina bepanggai ba tulung ari perintah aja.

Kaban Kunsil Nengeri (ADUN) Bukit Kota, Dr Abdul Rahman Ismail madahka sida  patut nguna peluang ke bisi nya kena ngasilka produk pengelandik jari sereta produk bukai ti tau  mai penguntung.

Raban KRT ku iya, ukai semina deka numbuhka sereta ngelakuka penyerakup tang mega tau ngangkatka ekonomi sida.

“KRT patut meda peluang ekonomi ke bisi ayan sereta nguji ngemayuhka penyampau produk menua tu kena ngangkatka tikas ekonomi sida.

“Kelimaph ari penyerakup, KRT patut nyadika pelasar  endur ngemansangka ekonomi sida,” ku iya.

Dr Rahman nyebut pekara nya sebedau ngelepaska raban KRT Limbang ke Kundasang Sabah ti Nemuai Berayaka Belajar ensanus.

Sama bisi  ngulu pengawa nya Chairman Penyelaras KRT Pelilih Mit Menua Sufian Mohat sereta Pemesai Penyerakup Bagi Menua, Fakri Asmad.

Ku iya baru, ulah ti ulih bediri ngatika diri sebaka enggau pengingin ati perintah ti meransang rayat ngerembang mayuh bengkah peluang ekonomi ke bisi.

Berebak enggau nya Sufian Mohat nagit deka nambahka penyampau KRT baru ti berejister manggai ba 16 buah dalam  taun tu.

“Naka ke diatu kitai ngembuan 28 buah KRT berejister ba Limbang lalu ari penyampau nya keda ngetanka rikud penyampau KRT kedua mayuh ba Sarawak,” ku iya.

Sufian arapka program ninting taun nya ulih ngiri penemu ti beguna ngagai raban nya nengah bengkel ke bisi diatur kelimpah ngerapitka kaul enggau sida bukai ari luar.