BINTULU: Raban orang dagang ti ngena payung ba semak terminal bas lama dipinta pindah enggau naka pengelengkas ngagai palan ke baru ba Terminal Bas 1Malaysia ditu.
Manijer Kanan Rampa Gerempung Pemansang Menua (BDA), Wan Ibrahim Wan Ali madahka, palan bedagang lama nya udah diambi raban kompeni swasta.
“Ngarapka raban orang dagang ba palan nya ulih pindah sereta meri kerejasama ke manah.
“Semua pemansang ti deka dikerembaika, tepulai ngagai kompeni swasta ti beempu palan nya,” pia ku iya bejaku ba palan Opis Perbinda, Jalai Sultan Iskandar ditu kemari.
Wan Ibrahim ngelalau mensia mayuh ngambika bedagang ba palan ke baru iya nya ba Parkcity Commerce Square laban palan nya disadangka deka dilawa mensia mayuh mega.
“Palan bedagang ke baru nya ngembuan perengka mensia mayuh ke engkeman ti diungkupka ngagai raban orang dagang nyengkaum palan bangsal enggau tamu endur bedaja,”pia ku iya bejaku baru.
Nambahka nya, iya mega ngelalau raban orang ke mai kerita suwa, teksi enggau bas dipinta sama pindah ngagai palan ke baru laban Poliklinik ti benung digaga deka tembu apin lama agi.
“Tu ngayanka orang dagang enggau raban ti mai perengka pengangkut mensia mayuh nadai napi pengerugi laban mayuh pemansang deka nyadi lebih agi semua palan kedai komersial udah laku dijual,”pia ku iya.
Berindik ari nya, iya ngarapka mensia mayuh patut meri timbal ke manah ngambi ngemujurka pemansang mengeri Bintulu.