KUCHING: Gerempung Lun Bawang Sarawak (PLBS), Pampang Kuching deka ngatur pengawa bejual pemakai ba Dewan Suarah Kuching kenake 30 Julai.
Pengerami bejualka barang pemakai ti diatur PLBS tu berengkah dipejalaika ari pukul 7 pagi ngagai pukul 3 lemai.
Nitihka penerang ari Chairman Pengatur, Petrus Abai madahka tuju PLBS ngatur pengawa bejual pemakai tu dikena ngiga belanja ngambika ulih ngatur mayuh bengkah aktiviti enggau program sepemanjai taun tu.
“Lalu belanja nya dikena gerempung ngatur seminar pelajar ba renggat sekula primary, sekondari enggau pelajar tinggi.
“Tu dikena nyikap nembiak napi peminta orang ti landik bekereja sereta profesyenel ba pemansang SCORE,” ku Petrus lebuh ti nguluka raban PLBS nemuai ngagai Menteri Pemansang Rama enggau Kandang Mengeri, Tan Sri William Mawan Ikon ditu, kemari.
Ari pengawa bejualka barang pemakai tu mega ku Petrus, PLBS ulih ngerapitka kaul entara pampang gerempung ba Kuching enggau gerempung bukai ke bisi ba mengeri Kuching.
Semengat 1Malaysia mega ulih diangkatka nengah program ke diatur gerempung.
Nambahka nya dikena meransang nembiak Lun Bawang masuk program main asal ngambika ulih ditampung.
Pengawa bejual ti diatur PLBS pampang Kuching endang tebuka ngagai gerempung ukai dikuasa perintah, opis perintah, kompeni luar enggau siku-siku.
Kelimpah ari barang pemakai enggau ai irup, sida ke deka ngambi bagi ba pengawa bejual mega ulih nyual perengka rumah enggau kebukai.
“Sida ke bejual maya tu ila enda tau enda nitihka atur lalu nyaga pemeresi endur bejual, enti enda tetihka atur sida ulih dikena penalti ti ditentuka pengatur.
Sida ti bejual deka mayar RM110 ke siti endur, lalu dibayar nengah nama Lun Bawang Association Sarawak, Kuching Branch.
Pengawa enchabut endur bejual deka diatur kena 28 Julai jam 2.30 lemai.
Mensia mayuh ti deka nemu penerang silik tau betelefon ngagai Chairman Pengatur, Petrus Abai (013-8193468/012-8286541), Sekretari, Parag Kaweh (019-8187263) tauka Flora Akep Etong (013-5707438).