KUCHING: Polis Sarawak diatu benung bejalaika pengawa pemansik penusah bebadi ba jalai alun ti nabanka nyawa semilan iku rayat Indonesia di Sri Aman ensanus.
Sapit Kepala Polis Menua Sarawak, SAC Datuk Law Hong Soon madahka penusah bebadinya tau bepun ari mayuh kebuah ti enda disadang.
Iya ngarapka penusah bebadi jalai alun ba menua tu kelebih agi rambau pengerami Hari Raya tu ulih dikurangka berindik ari Ops Sikap nyerumba pengerami nya ti deka dilancharka kena 23 Ogos tu.
“Kami diatu benung bejalaika pengawa pemansik nitihka ti udah diripot. Penusah bebadi ba jalai alun ba menua tu nyadi ari mayuh tegal baka gaya hari, pengilap diri empu, penanggul kerita, sereta ketegal jalai alun ti enda manah.
“Ngarapka nengah Ops Sikap nyerumba pengerami Hari Raya tu ti deka dilanchar kena 23 Ogos ulih ngurangka penyampau penusah bebadi ba jalai alun,” ku Law madahka awakka kami mansik pekara tu tulu.
Law dulu ari tu ngulu pengerami nyerah sereta nerima tanggung pengawa Kepala Pampang Khas Sarawak ke diatur ba Mes Pemesai Kanan, Indu Opis Polis Kontijen sarawak ditu,kemari.
Lebuh dipinta penyampau pesinjir ke dikemendarka ba sesebangkah perengka pengangkut , Law madahka pemayuh pesinjir bepanggai ngagai pemesai kerita.
Taja pia, pemayuh pesinjir dalam kerita nya enda patut ngelui ari ti udah ditetapka.
“Deriba patut mai pesinjir nitihka udan ti udah ditetapka lalu anang lebih ari nya ,” ku iya.
Sembilan iku rayat Indonesia lesi lalu seiku bakal ba penusah bebadi jalai alun entara kerita SUV enggau lori pengangkut buah enggau sayur ba kandang menua Jelukong, Engkilili Sri Aman urung 3.30 pagi ensanus.