KUCHING: Federal Agricultural marketting Authority (FAMA) nengeri Sarawak ngepunka program Jualan Terus FAMA ‘Jimat Belanja Dapur’ ba Pasar Tani Matang Jaya ditu, kemari.
Program ke sebaka mega bisi diatur ba 41 bengkah pasar tani serata menua Malaysia dalam kandang tiga bulan tu nyentukka bulan Oktober 2011.
Direktor FAMA Sarawak Paza @ Faizal Dan madahka program tu dipenyadika ba palan pasar tani ke udah dipilih iya nya ba Pasar Tani Matang Jaya enggau palan ngatur pengawa FAMA Samarahan tiap Hari Enam.
Pasar Tani tu deka bejualka asil betanam bekebun tiap Hari Enam berengkah sehari tu nyentukka bulan Oktober 2011.
Perintah besai udah ngasuh FAMA bejalaika pengawa bejual terus ba 41 bengkah pasar tani serata menua Malaysia nyerumba pengerami ngintu Hari Raya Puasa,”ku iya.
Tuju program tu diatur ngambika orang ke bebelika barang tauka pemakai ulih bejimat urung 5 ngagai 20 persin lalu semua rega barang dipatau FAMA, tandu iya.
Paza madahka entara tuju bukai program tu diatur ngambika tau ngemutarka isu bekal enggau rega pemakai nyerumba pengerami Hari Raya ke deka datai sereta FAMA mega deka muka palan sida iya empu ba pasar tani lalu nyual pemakai ngagai mensia mayuh.
Entara pemakai ke dijual FAMA nengah program ‘Jimat Belanja Dapur’ tu iya nya manuk, daging, kobis segala, kentang, bawang mirah, bawang putih, buah nyiur, nanas, gula sereta bawang besai.
Iya mega madah, nyerumba pengerami ngintu Hari Raya Puasa ke deka datai tu, FAMA nengeri Sarawak deka ngatur program bejual kena 27 enggau 28 Ogos tu.
Program dua hari bejualka pemakai sebedau Hari Raya deka diatur ngambika mensia mayuh teulihka rega ke patut dikena ngintu pengerami nya.
Barang pemakai deka dijual nengah rega urung 5 nyentukka 20 persin murah,” ku iya.
Raban pemekal udah meri jamin ngagai FAMA nadai suntuk bekal pemakai maya pengerami nya ila, tandu iya.
Paza ngarapka nengah program tu, FAMA ulih mantu netapka rega ke patut ba pasar tani sereta ba pasar bukai kelimpah ari mantu ngangkatka pengulih ari pengawa bejual raban orang dagang ba palan nya.
Orang ke bebelika barang mega tau teulihka barang dapur nengah rega ke patut tauka murah lalu nyaup sida iya bejimat ba belanja,” ku iya.