GAWA MEMANAH BA ENDUR BARU: Harden (tengah), Masir (kanan), begulai nyuaka pemeri ngagai Mohamad Yusli ti pindah sereta gawa ba Labuan berengkah ari ujung bulan tu.
Genap iku rayat patut bebasaka pangan diri enda milih bansa tauka pun jalai pengarap, ku Harden
SRI AMAN: Genap raban bansa sereta semua ke ngembuan jalai pengarap ba menua tu dipinta sama bebasaka pangan diri ngambika bela ulih nempa rayat ti likun sereta idup enggau lantang.
Menteri Muda Pemansang Tanah Sarawak, Datuk Francis Harden Hollis madahka, endang udah nyadi tanggung pengawa semua rayat nentuka pengelikun ba menua tu ulih diasaika belama.
“Enti semaka mensia mayuh enda bebasaka batang pengarap enggau adat asal raban bansa bukai ba menua tu, tentu kitai enda ulih beserakup,” ku iya.
“Nya mih kebuah, ulah ke bebatak asur enggau pangan diri beguna amat kena nentuka menua Sarawak enggau Menua Malaysia tu ulih nyapai pemansang belama.”
Iya bejaku munyi nya ba pengerami Bebuka Puasa, genturung Rukun Tetangga (KRT) Bagi Menua Sri Aman ti diatur Opis Penyerakup Bansa enggau Integrasi Nasional Bagi Menua Sri Aman ba Surau Al-Amin, Taman Srijaya, Sri Aman ditu lemai ensanus.
Ku iya, rayat ba menua tu chukup beruntung laban ulih begulai manah taja kitai ngembuan mayuh pupu raban bansa ke megai mayuh batang pengarap baka Kristian, Islam, Buddha enggau ke bukai sereta bebasaka pangan diri.
“Ulah ke baka nya ulih dipeda lebuh kitai sama begulai ngintu pengerami besai ninting taun,” ku iya.
“Kitai mega patut berasai temegah ati ulih ngintu semua pengerami pupu raban basa ba menua tu baka Krismas, Taun Baru Cina, Hari Raya, Hari Gawai, Deepavali enggau pengerami ke bukai.
“Nengah pengerami tu,mensia mayuh ulih ngabang ngagai rumah pangan diri ke bebida bansa enggau batang pengarap.
“Aku minta pengawa ke baka tu dipajakka belama ngambika rayat Malaysia seruran lantang senang belama,” ku iya.
Sama bisi ngulu pengerami tu Kaban Parlimen Sri Aman, Masir Kujat, Pemesai OpisPenyerakup Bansa enggau Intergrasi Nasional Bagi menua Sri Aman ke dulu suba, Mohamad Yusli Nassir, Chairman KRT Taman Sri Jaya, Alhias Muhi, bala ketuai opis, bala Chairman KRT ba genturung Sri Aman sereta bala raban KRT ke bukai.
Nyerumba nya mega, Harden deka ngungkupka belanja sama penyampau RM 5,000 ngagai Komiti Surau Al-Amin, Sri Aman enggau KRT Taman Srijaya.
Pengerami Bebuka Puasa nya mega disempulang enggau Pengerami Beserara enggau Pemesai ari Opis Penyerakup Bansa enggau Integrasi Nasional Pelilih Sri Aman, Mohamad Yusli Nassir ti deka pindah gawa ba Labuan.