15 rumah panjai SPPB minta dikemendarka berumah ba danau Tekat Hidroelektrik Bakun
BINTULU: Lima belas kayu rumah panjai ba Skim Pengentap Pendiau Bakun (SPPB) minta perintah tauka ejen ti bekuasa ngemendarka sida nuduk rumah jelatung ba danau Tekat Hidroelektrik Bakun.
Maren Uma Ellison Duren Lihan ari Uma Bawang madahka pengawa ke deka nyerekang rayat ti ngambi awak deka bejalaika pengawa dagang ba danau nya ulih nekul penatai pemisi sida.
“Jelatung ke ditumbuhka ba danau nya sigi enggi rayat Sg Asap nyadi palan alai belelak sereta palan nupi ikan ba sangkar.
“Rayat menua tu empu deka bejalaika pengawa dagang temuai ba rumah jelatung nya kelimpah ari ti disuwa ngagai raban ari Bintulu enggau Miri ti rinduka pengawa nginti sereta beperindang meda rampa menua ba danau nya,” ku iya bejaku ngarika 15 kayu rumah panjai ba aum pengarang berita ti diatur ba Hotel Li Hua Bintulu ditu kemari.
Berebak enggau nya, iya mega ngarapka raban perintah meri pemendar sereta nyukung raban rayat bejalaika pengawa dagang sida ba endur nya.
“Minta perintah tauka raban ejen ke patut bejalaika tanggung pengawa sida nulung sereta mantu kami ngangkatka pengawa dagang tu kelebih agi ngemendarka kami bejalaika pengawa dagang nengah chara ke betul.
“Tu ngambika kami bulih penguntung sepengudah kami meri tanah temuda nyadika palan nuduk Projek Hidroelektrik Bakun,” ku iya.
Berebak enggau nya, sida ari 15 bengkah rumah panjai nya mega ngenggaika jaku ti madahka rumah jelatung sida ngerusak sereta ngamahka pemeresi ai danau nya.
“Nyaga pemeresi enggau pemanah kandang danau nya sigi udah tanggung pengawa kami laban rayat menua tu semina bepanggai ngagai danau nya alai ngiga jereki,”ku iya.
Lebuh bekenangka pengelikun mensia mayuh ba danau Bakun nya, sida iya ngarapka mensia mayuh patut betanya ngagai rayat ti memdam ba menua nya empu senentang isu bekaul enggau danau Bakun.
“Kebuah pia laban kami ke memdam ba menua tu empu tebal agi nemu nama utai ti nyadi ngagai palan menua kami,”pia ku iya.
Entara raban Maren Uma ti ngenataika penerang berita tu iya nya Maren Uma Edok Maring ari Uma Balui Liko, Maren Uma Batang Langat(Uma Kelap), Maren Uma Lajang Nyipa(Uma Lahanan), Maren Uma Datin Sri Devong Anyie(Uma Nyaving),Maren Uma Liah Japi(Uma Daro), Maren Uma Ding Ajang(Uma Belor), Maren Uma Gun Imang(Uma Kulit), Maren Uma Lating Avun(Uma Balui Ukap), Maren Uma Palan Bisau(Uma Bakah), Maren Uma Nyaban Kulleh(Uma Badeng), Maren Uma Minggu Magui(Uma Penan Talun), Maren Uma Donny Dian Talik(Uma Juman), Maren Uma Huvat Laing(Uma Lesong) enggau Maren Uma Ngarie Lijap(Uma Ukit).
Apin lama ti udah, surat berita The Borneo Post bisi mansutka berita bekaul enggau rumah jelatung ti digaga ba danau ai Bakun balat ngirauka ati nyengkaum Menteri Langgur Kedua enggau Pengintu Pemisi, Datuk Amar Awang Tengah Ali Hassan enggau Kaban Parlimen Hulu Rejang Datuk Billy Abit Joo.
Nitihka penerang ti dipansutka Billi Abit, iya minta perintah mutus enggau lengkas sereta netapka ijinsi ti berempu tanggung pengawa ngemutarka penanggul jelatung nengah atur ke patut.
Berindik ari nya, Awang Tengah ngemansutka timbal penemu ti deka ngemendarka perintah menua nengah Komiti Tekai Ai Bakun tauka JPKEHEB mansik enggau silik senentang pengawa ngaga rumah jelatung ba danau Bakun ngambi kualiti rampa menua enda rusak enggau enda ngacau pengelikun mensia mayuh.