KUALA LUMPUR: Nyerumba pengerami Hari Kemerdekaan ke-54, Sapit Menteri Besai Tan Sri Muhyiddin Yassin mai semua rayat ngulihka juluk ati sereta begempung ngemujurka agenda transformasi menua kena nentuka pengelantang rayat.
Iya madahka penyerakup ti rat entara rayat ke datai ari mayuh bengkah pupu bansa enggau pengarap iya nya pun pemujur kena ngemujurka agenda transformasi menua.
“Seharitu, menua kitai benung dalam sebengkah proses transformasi ti besai reti dibaruh iring Menteri Besai Datuk Seri Najib Tun Razak ke nusun nyadi sebengkah menua maju sereta nyapai tikas penatai pemisi ti tinggi lebuh manggai taun 2020,” ku iya dalam jaku pesan nyerumba Hari Kemerdekaa ke-54 ditu, seharitu (ensanus).
Nya alai, ku iya, rayat patut meri sukung ngagai agenda transformasi menua ke benung dikemujur laban nya pekara ti nentuka pengelantang jemah ila.
Nambahka nya, Muhyiddin madahka semua rayat patut ngerapitka penyerakup enggau diri sama diri sereta ngemeratka pekara ti dikemeranka dalam Gagasan 1Malaysia.
“Kitai ngitang Jalur Gemilang ba rumah, perengka pengangkut enggau opis ketanda pengangkun sereta penaluk ngagai menua ti dikesayau. Kitai ngingatka semua pemanah bala tuai ti ngiring kitai dulu kelia, kena nunjukka kitai berasai temegah ati ngagai pengawa ti dikereja sida.
“Kitai angkunka semua pengelantang enggau penyamai ke diasai ngelama tu, nya reti iya kitai idup dalam menua ti likun, lantang, nyamai enggau merdeka,” ku iya.
Iya madahka 31 Ogos ninting taun iya nya hari endur nunjukka rayat Malaysia bebasaka tiap singkang pengidup, seput dalam sebengkah menua ti merdeka.
“Mayuh pemujur ke udah diasaika nyadi bansa ti merdeka. Kitai mujur ngemansangka menua iya nya ari menua ti bepanggai ba ekonomi bumai enggau betanam betupi ngagai menua industri ti moden,” ku iya.
Muhyiddin madahka entara pemujur ke dijapai sepemanjai kemerdekaan iya nya ngemunaska penyeranta, nyendiaka pelajar ti besai, numbuhka ekonomi ti majak ngerembai, negapka penyerakup ba rayat ke mayuh pupu bansa enggau pengarap, politik ti stabil enggau nyaga pengelantang menua. — Bernama