Wednesday, September 18

MAIS ngarapka Forum ulih nyaguka pemujur jaku Iban

0

NYAGU PEMANAH JAKU IBAN: Nellie (dua kanan) nerima surat FJI ari Chairman Pengatur FJI Edwin Jemat, lalu sama diperatika raban FJI bukai, Mathias Kasap (kiba), Jacqueline David (dua kiba), sekiteri FJI Churchill Edward, enggau Jimbun (kanan) ari MAIS.

KUCHING: Opis Kun­sil Penyimpan Adat Asal Sarawak (MAIS) entara opis Kunsil Adat ke nyukung Fo­rum Jaku Iban (FJI) ti deka dipenyadi kena 17 September tu ila.

Kepala opis kunsil nya, Datu Nellie Tangai ma­dah tiap gerempung, opis, institusi pelajar tinggi ke ngangkatka jaku Iban patut begempung sama nyukung FJI ti diatur Opis Menteri Pemansang Rama enggau Kandang Mengeri begulai enggau sebengkah kompeni surat kabar, Utusan Borneo Bagi Iban.

“Kami nyukung pengawa tu lebih agi MAIS entara gerempung opis linguistic endang meransang pengawa baka tu,” ku iya lebuh nge­laluka penatai kemiti FJI ke betemu enggau iya ba opis iya ditu, kemari.

MAIS siti opis perintah ke mayuh ngemansangka pen­gawa adat lebih agi ba adat Iban bisi mega bejalaika pan­sik sida iya ba adat sereta jaku Iban ke digaga nyadi bup lalu tau dikena lebih agi bekaul enggau pansik adat Iban.

Ku Nellie, mayuh bup sereta pengawa pansik pasal adat Iban digaga nyadi bup ulih opis tu.

“Semina kami minta timbal ari Opis Pelajar ba pekara ke udah diperambu kami ke nyangka ulih dikena ba sekula, tang naka kediatu kami agi nganti timbal ari opis pelajar.

“MAIS ari pun suba endang ngemeratka jaku Iban. Mayuh bup ke udah digaga kami nyengkaum sekeda ke bisi disalin ari sekeda orang ke bisi dikerandau kami, digaga nyadi bup, ngambika lebuh dipinta orang ke begunaka bup nya chukup dikena sida iya lebih agi ba sekula. Nitihka ripot, perengka ke dikena bekaul enggau pelajar jaku Iban ba sekula endang enda chukup.

“Lebih agi perengka ke udah disalin ngagai bup. Barang sapa ke deka begunaka perengka nya tau nanya ba opis MAIS,” ku iya.

Peluang baka atur pengawa FJI ti deka diatur enda lama agi nyadi palan alai MAIS madahka pemisi perengka ba opis nya.

“Semina penanggul kami laban kami begunaka belanja kena kami ngaga perengka nya, tang pelaba aku nyangka Opis Pelajar bisi belanja ulih nyukung projek tu.

“Tu chara ke manah endur kami madah ngagai orang mayuh, kami bisi kereban nya, kami bisi orang ke landik sereta penau ngeluarka bup. Semina belanja ke dikena nge­luarka bup tu enda chukup. Nya alai, FJI tu palan ke manah alai kami madahka pemisi sereta penau kami ukai semina pasal adat tang mega ba Jaku Iban,” ku iya lalu nambah pemisi ke bisi dikembuan sida semina datai ari bantu perintah.

Ba pekara ke sama nya mega, Nellie madah FJI ke deka meri kelala bekaul eng­gau sepil tauka jaku Iban nge­na sistem ‘alphabet’ Dunging siti singkang ke manah.

“Nyepil chara Dunging tu nitihka chara lama, tang ba MAIS kami bisi versi ke modern agi ke dikelala enggau nama ‘Papan Turai’ ke senang dipelajar sebarang orang ke nyadi Dunging MAIS.

“Kami bisi chara ngaga Papan turai tu. Siti lambar Papan turai ulih digaga nyadi siti bup. Dunging tu versi ke lama, ke ulih dikena genap iku bansa Iban tang ngena Papan Turai tu baka versi ke modern,” ku iya.

Chara ngena Papan Turai tu disema enti deka nemu pasal jalai cherita bup nya, semina nitihka atur ba Papan Turai nya aja ke di sedia enggau jalai cherita sereta lambar ba bup ke patut dibacha.

Taja pen Papan Turai tu bedau dikemendarka perintah tang iya siti ari chara dikena ngemansangka jaku Iban.

“Papan Turai tu chara ke ulih dikena belajar, nyangka enda maya tu tang jemah ila. Tang enti Opis Pelajar deka mandingka Papan Turai ke kelia enggau ke dudi tu, kami ulih ngeluarka bup nya,” ku iya.

Tuju ke batang Papan Turai tu manah dikena lebih agi lebuh ngaga ‘plot’ cherita tauka bechuntoka ke udah digaga MAIS, Timang Gawai, Ngiga Tuah, ke manah dikena belajar ulih bala nembiak sekula.

Enti kelia, chara ngena Papan Turai tu ngena arang lebuh sida nulis ‘plot’ cher­ita.

“Tu entara siti identiti kitai Iban bekaul enggau sepil jaku Iban,” ku iya.

FJI ke deka diatur kena 17 September ba Hotel Four Points by Sheraton tu ila deka digulu urung 250 iku raban Iban ke pandai sereta landik nyengkaum pemesai Iban ke bukai ari serata Sarawak tu.

Entara sekula ke bisi eng­gau FJI tu ila, iya nya sekula dalam kandang pelilih menua Kuching ke bisi ngelatih ngajar Jaku Iban ba Institut Perguruan (IPG), empat buah sekula ke bisi ngajar Jaku Iban baka SMK Balai Ringin, SMK Muara Tuang, SMK Serian enggau SMK Tun Abdul Razak.

Sama bisi nguluka aum nya kemari, Kepala Pemansik MAIS Jimbun Tawai sereta sekeda raban kemiti FJI.