Thursday, September 19

Nellie: Kompeni aruh betanya ari MAIS sebedau ngaga tukis mandangka adat bansa Iban

0

KUCHING: Pemanah adat bansa Iban ukai semina dipeda ninting hari tauka maya begawai tauka lebuh bisi pengerami bukai tang iya mega suah digaga nyadi filem ulih industri filem menua tu tauka antarabansa.

Tang taja pia, dalam ati ke gagit ngaga filem ke bisi mandangka adat Iban, Opis Kunsil Penyimpan Adat Asal Sarawak (MAIS) semina ngelalau kompeni ngaga filem patut bejimat lebuh ngaga jalai cherita ke mansa pengidup bansa Iban.

Kepala Opis MAIS, Datu Nellie Tangai madahka sekeda filem ke bisi man­dangka Adat Iban patut ditanya dulu pemetul adat Iban nya ba MAIS tauka opis ke bisi kaul enggau adat Iban sebedau iya digaga nyadi filem.

“Bisi filem ke diambi ba menua tu ngena adat Iban bekaul enggau pengawa tikah. Sigi enda betul chara sida ngaga filem nya, laban adat tikah bansa Iban ukai bansa nya.

“Pekara baka tu ba adat Iban sigi sensitif laban kitai mayuh bagi ba adat. Bese­maka adat tikah, ukai semina ngambi indu aja, diau begu­lai semalam lalu mulaika diri mai indu tauka ‘bini’ ngagai menua ke deka dituju orang nya. Adat tikah kitai penuh basa,” ku iya.

Nya alai ku iya, tiap filem ke deka digaga bekaul eng­gau adat Iban, patut dipan­sik dulu ba opis MAIS tauka opis ke bisi kaul enggau adat, nanya dulu pemetul adat nya tau dikena tauka enda, ku iya.

Dalam mayuh filem antarabansa ke udah di­ambi gambar ba menua tu ke ngena adat Iban, semina filem ‘Farewell to the King’ aja ke bisi betanya ba opis MAIS.

Filem “Sleeping Diction­ary” ke dilakun seiku artis antarabansa Jessica Alba, konteks adat Iban ke dikena jauh enda sebaka ari adat ke bisi dikembuan bansa Iban.

Ku Nellie, tukang ngaga filem ‘Sleeping Dictionary’ nya nadai betanya pasal adat Iban sebedau adat sereta jaku Iban ke dikena dalam filem nya nyerumba adat tauka jaku Iban asal.

Pia mega tukang ngaga filem ari semenanjung tauka ari menua tu empu sama dilalau ngambika betanya ba opis MAIS dulu sebedau ngaga filem ke bisi kaul eng­gau adat Iban.