15 raban pengari deka mandangka tanda singa berengkah 10 Sept tu

0

KUCHING: Gerempung Tanda Naga Singa Hill Kuching (PTNSHK) ba Jalan Wan Alwi deka ngatur pengerami dalam kandang seminggu (10-18 September tu ila) lalu entara atur pengawa ke dipelaba naritka ati mensia mayuh nya ila, iya nya ‘Tanda Singa’ ke deka dipandangka 15 kontingen ukai semina ari pelilih menua tu tang mega ari pelilih menua bukai.

Gerempung tu ke betuaika Michael Loh bisi nemuai ngagai Menteri ba Opis Kepala Menteri Datin Fatimah Abdullah minta iya bejadika atur pengawa nya.

Kelimpah ari ‘Tarian Singa’ ulih 15 kontingen nya, aktiviti bukai baka Karaoke sama mega bisi diatur ke dibagi ngagai dua kategori, iya nya kategori nembiak kolej/universiti enggau kategori veteran enggau bala nembiak bemain orkestra.

Ku Fatimah, ‘Lion Dance’ ke keterubah iya dibai dalam penyampau nya ba mengeri tu, deka belabuh bebaris ba bulatan King Centre ari pukul 7 lemai ngagai urung pukul 10 malam.

Sebedau nya, Loh madahka program ke sigi seruran diatur dalam bulan September, ninting taun tang semina sekali tu iya digaga dalam skala ke besai.

“Pengerami tu mega diatur beserimbai enggau pengerami ‘Temple Eight Deities’ nyengkaum sekeda aktiviti bukai.

“Pekit karaoke deka belabuh ari 10 September dalam kandang seminggu nya lalu penutup program deka diatur kena 17 September,” ku iya.

Menteri Wang Kedua Dato Sri Wong Soon Koh ti mega nyadi Sapit Sekretari Besai SUPP dipelaba sama datai bejadika atur program nya.