TEMEGAH ATI ULIH NYUKUNG: Francis (tengah) nyerahka chek ngagai Edwin Jemat ba opis iya ditu, kemari sereta bela dikemataka Churchill. — Gambar Chimon Upon
Bepelasarka nya ila, pemujur sereta pemanah jaku Iban ulih dikerembai nengah nembiak rebak baru
KUCHING: Menteri Muda Pemansang Tanah, Datuk Francis Harden Hollis kemari nyuaka bantu ari iya empu dalam penyampau RM5,000 ngagai kemiti Forum Jaku Iban (FJI) 2011 ke nyadi tanda sukung iya ngagai forum tu ke keterubah iya diatur.
Atur pengawa nyerahka chek nya ba opis iya ba Bangunan Baitulmakmur ditu, disua ngagai chairman pengatur forum, Edwin Jemat.
Sama bisi ngulu atur pengawa nya, iya nya sekretari pengatur forum, Churchill Edward, sekretari pemadah, Mathias Kassap enggau sekretariat forum Edwin Tawie.
Harden ti mega Kaban Kunsil Nengeri (ADUN) Simanggang, ba jaku iya madahka atur pengawa FJI 2011 sigi patut diatur lebih agi dikena ngangkatka pemanah sereta pemujur jaku Iban lalu nyengkaum meri kelala tauka ngajar orang mayuh chara ngena jaku Iban ke betul.
“Dikearap nengah forum tu ila, bisi atur ke betul ngena jaku Iban lebih agi ba rebak nembiak kemaya hari tu,” ku iya.
FJI 2011 ti diatur begulai Opis Menteri Pemansang Pengawa Rama enggau Urbanisasi (KPSU) enggau Utusan Borneo Bagi Iban deka di atur kena 17 September tu ila ba Hotel Four Points By Sheraton, Kuching.
Kelimpah ari Harden, naka kediatu orang bukai tauka pemesai enggau kompeni ke udah sama mantu FJI 2011 iya nya Harian Borneo Sdn Bhd, Hijau @ BDC, Kaban Parlimen Kapit, Datuk Alexander Nanta Linggi, Menteri Pemansang Pengawa Rama enggau Urbanisasi, Dato Sri William Mawan Ikom (ti mega nyadi patron FJI 2011), Menteri Pemansang Tanah, Tan Sri James Jemut Masing, Menteri Rampa Menua enggau Pengeraja Asal, Dato Sri Douglas Uggah Embas, Kaban Kunsil Nengeri (ADUN) Engkilili, Dr Johnical Rayong, ADUN Balai Ringin, Snowdan Lawan enggau Kaban Parlimen Lubok Antu William Nyalau Badak.