Pengereja pengawa perintah patut ngemeranka pemanah pengawa

0

KAPIT: Kaban Parlimen Kapit Datuk Alexander Nanta Linggi ngelalau raban orang ke gawa ba opis perintah ngetanka pemanah pengawa sida ti meri servis ngagai mensia mayuh. “Raban orang ke gawa perintah patut bejalaika tanggung pengawa baka meri servis ngagai mensia mayuh enggau manah sereta bedisplin lalu nambahka penemu ti udah bisi nya, ngambika ulih ngisi juluk ati mensia mayuh,” ku iya lebuh ti bejaku ba pengerami Makai Lemai Merdeka-Raya ti diatur Opis Residen enggau Opis Pelilih Mit Menua Pejabat Kapit, ba Kompleks Perintah Menua, Jalai Bletih, ditu malam ensanus.

“Jalai ti nyambung ba menua Kapit tu mega enda manah, laban tebal agi sekeda endur semina ulih digusung nengah jalai ai. Tu mih pemar ti ditapi orang ke gawa perintah ke gawa ba menua Kapit. Mayuh pemar dirembang sida enti deka ngabas mensia mayuh ba menua pesisir.

“Aku arapka kita semua ke gawa ba menua Kapit tu anang mantul ati napi semua pekara tu. Batang pengawa orang ke gawa perintah iya nya, meri servis ke pemadu manah ngagai mensia mayuh enda ngira ba kandang nengeri tauka menua pesisir ,”ku iya.

“Terima kasih ketegal sukung enggau kerejasama kita semua laban udah nulung aku ngenatai agenda tauka program ari perintah dikena nulung rayat,”ku iya.

Berebak enggau nya, Alexander nyuaka geran berjumlah RM 10,000 ngagai Komiti Pengatur Safari Baleh-Kapit 2011, lalu RM 24,000 di beri ngagai Komiti Nguruska Masjid Jabal An-Nur Kapit.

Sama bisi datai ngulu pengerami nya, Residen Kapit, Dahim Nadot, Pemesai Opis Pelilih Mit Kapit Simon Japut Tiok, Sapit Residen Mohd Ikhmal Abdullah, Pemesai Opis Pelilih Mit Song Galong Luang enggau raban orang ke gawa perintah ke bukai.