Penyandang Mas Gading apin ditetap ngetanka penuduk nya

0

KUCHING: Penyandang kerusi Parlimen Mas Gading Datuk Dr Tiki Lafe ari Parti Progresif Demokratik Sarawak (SPDP) apin ditetapka diasuh bediri nyadi chalun baru lebuh maya pengawa Bepilih Besai Menua (PRU-13) tu ila.

Presiden SPDP Tan Sri William Mawan Ikom madah, berindik ari Dr Tiki ke enda mujur ngenataika diri ngagai tujuh aum Supreme Council parti nya dalam dua taun tu ke udah, lalu nadai kala madahka peneka iya empu deka bediri baru tauka enda.

Ku iya, nya barang ku Dr Tiki enti iya deka terus ngetanka kerusi nya.

“Kitai bedau ninga ari Kaban Parlimen (Dr Tiki) empu bekaul enggau penuduk iya laban iya empu nadai datai ba aum tu,” ku iya ba aum media sepengudah becherminka Aum Supreme Council parti ba Indu Opis SPDP ditu, kemari.

Mawan ti mega nyadi Menteri Pemansang Rama enggau Kandang Mengeri kelimpah ari nya, madahka SPDP agi mengkang ngetanka tiga penyandang bukai, iya nya Kaban Parlimen Baram Datuk Jacob Dungau Sagan ti mega nyadi Sapit Menteri Dagang Antarabansa enggau Industri, Kaban Parlimen Saratok Jelaing Mersat (Sapit Menteri Pengangkut) enggau Kaban Parlimen Bintulu Datuk Seri Tiong King Sing.

Mawan mega madahka penyikap parti nya enggau komponen parti Barisan Nasional (BN) ke deka betapi enggau PRU, enda lama agi.

Ba PRU 2008, Jacob ti mega nyadi mandal presiden kanan SPDP mujur ngalahka Kebing Wan ari Parti Kebangsaan Sarawak (SNAP) enggau 7,996 undi lalu Kebing Wan tulihka 3,952 undi.

Kelimpah ari nya, Jelaing mujur ngalahka Mohd Yahya Abdullah (PKR) enggau undi 12,470 lalu Mohd Yahya (3,764 undi)

Tiong mujur tulihka 23,628 undi lebuh iya ngalahka Lim Su Kien (DAP).