KUCHING: Belabuh ari taun baru tu ila, tiap barang ke dijual nengah opis FAMA enda tau enda nitihka atur 3P ke udah ditetapka opis nya, ku Tuai Opis FAMA Sarawak, Paza Dan.
Nama 3P nitihka jaku pandak ari atur enda tau enda bisi tanda barang, bungkus enggau gred nyengkaum mungkus barang ke deka di jual nya.
Atur tu ku Paza, udah lama dikena ba semenanjung tang ba Sarawak deka dikena belabuh ari taun baru tu ila.
“Projek atur 3P nengah opis FAMA nyengkaum ngena bansa rachun, chap barang…Reti nya kitai nemu ari ni penatai sayur tauka buah tauka produk asil betanam betupi bukai ke dijual ba pasar.
“Baka reti orang betanam betupi A ke deka nyual produk iya nengah atur FAMA, enda tau enda bisi chap ba produk sida iya mantaika nama orang nya, orang ke nyadi pemekal, bansa komoditi engga sekeda penerang bukai. Enti sayur nya ditemu bisi ngena rachun (lebuh iya ditanam), Opis Betanam Betupi ke bisi kuasa bekaul enggau pekara tu tang kami ba FAMA ngembuan sistem beratika produk nya bisi bekau rachun tauka enda,” ku iya.
Iya madah baka tu lebuh di kerandau sepengudah atur pengawa ‘Majlis Anugerah Khidmat Amat Setia dan Setia 2011, Jasamu Dikenang, Hari Bertemu Pelanggan dan Ramah Tamah Aidilfitri FAMA Negeri Sarawak 2011’ ba Galeri Pustaka, Pustaka Negri Sarawak, ditu kemari.
Pemansang naka kediatu bekaul meri pemadah pasal 3P tu ku Paza, benung dipejalaika nengah atur seminar sereta program meri kelala bekaul enggau 3P, lalu ditaga atur 3P ba orang dagang betanam betupi nyangka deka belabuh dikena pun taun tu ila.
“Pemansang meri kelala 3P ngagai orang dagang betanam betupi benung di atur chara berenggat ba Sarawak. Jemah ila, sida ke bejual asil betanam betupi enda tau enda bisi chap, bungkus, sukat, nama orang ke nanam produk nya, pemekal sereta pemadah bukai, ngambika enti bisi sebarang penanggul ke nyadi, nyamai kami mansik ari chap nya,” ku iya.