TERIMA KASIH LABAN SUKUNG NUAN: Abdul Ghariff (kanan) nyuaka pemeri ngagai Yip, lalu sama diperatika Paza (dua kanan).
KUCHING: Palan Dagang Satok (MNS) sebuah projek pasar Satok ke patut dipindah ngagai sitak Kubah patut udah tembu bulan September tu, diatu dipanjaika agi timpuh penembu nya ngagai bulan November tu ila.
Kepala Opis FAMA Menua Sarawak, Paza Dan madahka projek Satok tauka MNS dipanjaika timpuh ngaga pasar tu laban agi bisi sekeda pekara baka ngaga jalai alun nuju ngagai pasar baru (MNS) nya patut diputarka dulu.
“Projek tu patut tembu ujung taun tu lalu nyangka belabuh dibuka taun baru tu ila. Tang kediatu, Perintah Menua benung ngaga jalai ba mua projek nya, lalu dipelaba tembu dalam kandang enam bulan tu ila,” ku iya madah lebuh dikerandau sepengundah bejadika atur pengawa ‘Majlis Anugerah Khidmat Amat Setia dan Setia 2011, Jasamu Dikenang, Hari Bertemu Pelanggan dan Ramah Tamah Aidilfitri FAMA Negeri Sarawak 2011’ ba Galeri Pustaka ditu, kemari.
Iya nambah MNS enda diseguaika laban pekara ke batang iya nya mutarka jalai nuju ngagai MNS, kena nyeliahka penyekut jalai sereta nyendiaka semua infrastruktur ba palan nya dulu.
Palan MNS, iya nya siti projek begulai entara Perintah Menua enggau Perintah Besai ke di gaga ngena ungkus RM34 juta dijangka tembu dalam bulan November tu ila, lalu berengkah ari taun baru (2012) semua sida ke bedagang ba pasar Satok ulih pindah ngagai palan baru nya.
“Sida ke bejual ba pasar Satok, pasar Minggu Hari Enam enggau Hari Minggu, Tamu enggau Benteng deka dipindah ngagai MNS lebih agi bala orang dagang ke bejual asil betanam betupi, sayur, buah, manok, ikan….Iya baka makit ke modern,” ku iya.
Semua perengka guna ke disedia ba makit nya ila deka disedia enggau perengka guna ke modern, beresi sereta di pansa jalai, ku iya.
Pengawa FAMA dalam palan MNS tu semina nyendiaka perengka guna alai bedagang, lalu lisin sereta bayar dipegai Opis Kunsil Bandaraya Kuching Utara (DBKU).
Sebedau nya, FAMA Sarawak mega bisi meri kelala ngagai lapan sereta tiga iku orang gawa ba opis FAMA ke bisi nerima ‘Anugerah Khidmat Amat Setia’ enggau ‘Anugerah Setia Tahun 2011’ FAMA Menua Sarawak. Sama diberi kelala ‘Jasamu Dikenang’, seiku pemesai opis FAMA ke belabuh pinchin kemari, Yip Cheok Wing.
Sama bisi ngulu atur pengawa nya, Tuai Opis Kanan Khidmat Pengurusan FAMA Malaysia, Abdul Ghariff Ramin.