Iya besedia betapi enggau raban penyakal bekenaka isu tanah ba PRU-13
JELAING MERSAT
SARATOK: Ba pengawa bepilih menua Sarawak tu tadi, penyandang Kunsil Nengeri (DUN) Krian Datuk Peter Nyarok Entrie udah alah ngelaban chalun parti Keadilan Rakyat (PKR) Ali Biju.
Berindik enggau nya, diatu berita selebubu madahka Kaban Parlimen (MP) Saratok Jelaing Mersat enda ngetanka penuduk nya ke udah dipegai iya sepengalama dua penggal.
Sekeda berita mega madahka pengering parti penyakal ba Parlimen Saratok ngeringka agi berita ngumbai iya enda ngetanka penuduk nya.
Pia mega, ketegal Peter Nyarok ke enda mujur ngetanka penuduk Krian bisi bekaul enggau pekara nya ti ngelamatu sitak nya nyadi kubu kering Barisan Nasional (BN) lalu udah ngubah enggau ngenyit gaya politik Saratok.
Penerang ke madahka Jelaing Mersat ke lalu nyadi Sapit Menteri Pengangkut entara raban Parti Progresif Demokratik Sarawak (SPDP) deka ngetanka penuduk nya, sekali agi narit ati mensia mayuh.
Jelaing lebuhka betemu Utusan Borneo madahka, pengawa raban ketuai parti ngasuh iya ngetanka penuduk Saratok udah meri basa ngagai iya.
Ku iya, nya siti ari juluk parti enggau BN mulaika pengarap ati rayat ngagai perintah BN.
“Aku besedia nerima pengandal ati tu lalu deka bebendar sereta ngenanka penuduk Parlimen Saratok ungkup BN.”
“Aku nemu sepengudah pengawa bepilih menua tu tadi, mayuh cherita udah pansut mansa pending tang aku andal ati rayat agi nyukung BN ba sitak Parlimen Saratok,” ku iya.
Ditanya bekaul enggau pengering raban penyakal ba sitak nya, iya madahka nya tepulai enggau rayat.
Ku iya nandu, Malaysia siti ari menua ngundan prinsip demokrasi lalu rayat bisi hak nentuka juluk diri empu.
Nitihku Jelaing, BN nadai kala nyekat raban pengundi lalu sida (pengundi) diberi awak nentuka nasit diri.
Tang, ku Jelaing, gaya politik pemansang BN ke diatur ngelamatu mujur ngubah nasit rayat lalu tu nadai kala digaga parti bukai.
“Kita empu ulih meda ba Saratok…ngelamatu rayat kala dipegai penyakal.”
“Nya alai, aku pechaya rayat ditu empu nemu berunding ke utai ti betul kena nentuka nasit sida,” ku iya nandu.
Lebuhka ditanya bekaul enggau isu tanah ke sekali agi nyadika isu penyakal ba PRU-13, iya madahka pekara nya deka nyadi laban ba Saratok sigi nadai isu bukai kena nguntungka penyakal.
Tang tajapan pia, BN seruran beratika pekara nya lalu BN mega besedia mutarka penanggul rayat ngagai raban bekaul kena nentuka pekara ke amat-amat nyadi.