SARATOK: Bangkai niang Sulaiman Abdullah udah dibai kaban belayan enggau sida sebilik pulai ari Sepital Saratok ngagai menua sida ba Kampung Melayu Roban urung pukul 2.25 lemai ensanus sereta ditumbak ba pendam orang Islam kampung nya pengudah pengawa buntas pansik dipejalaika ba sepital lemai nya mega.
Niang Sulaiman Abdullah, 66 taun ari Kampung Melayu Roban udah ditemu melepung enda jauh ari kandang Sungai Anak urung dua kilometer ari tempat iya dipanggum baya nya enda jauh ari Lubok Kersik.
Berindik ari bangkai niang nya ke ditemu urung pukul 7.00 lemai ensana dia pengawa SAR ke udah dua hari dipejalai lalu diketu.
Pengelenyau Sulaiman bepun ari sepenembu iya berikan seraya iya ke benung nyikap deka mulaika diri mai asil ulih berikan begulai enggau anak sereta uchu iya.
Cherita nyelai mandangka bangkai niang nya meruan ngepan sereta nadai sebarang kelai ba tubuh iya bisi diempa baya nya.
Kepala Polis Pelilih Mit Saratok DSP Lee Thai Lien nengah Jaku Pesan Pandak (SMS) ngagai pemberita ensana madahka bangkai Sulaiman udah dibai ngagai Sepital Saratok ngambika tau dibuntas pansik sebedau diintu sida sebilik enggau kaban belayan niang nya.
Lebuh nyaut tanya sekalika pengawa ngasu baya deka diketu tauka enda, Lee nyaut naka ke diatu, nadai atur madahka baya ganas nya deka diasu taja orang ba kandang menua nya tetap ngemeratka pengelikun lebih agi bala anak sida.
“Semua tu bepanggai ba Opis Kampung (Jelu Siga) ngatur semua ke patut,” ku saut iya nengah SMS ngagai pemberita ensanus.
Berebak enggau nya, bisi mega mensia ba kandang menua nya mansutka sebana diri ngambika pengelikun sida dikemerat belama.
Mamat Kasa, 27, lebuh dikerandau pemberita madahka diri alit ati kebuah baya ganas nya enda ngerusi mimit pen tubuh niang nya.
“Baka ke suah ditemu kitai, nadai kala kitai ninga baya nulak pemakai tang sekali ke tu nitih ku cherita raban pengasu, Bujang Seblak nya semina ‘betundi’ sebedau iya ngeluaka bangkai niang nya.
“Ba pikir aku, tu mandangka taja pen baya nya bisi niat munuh tang gaya iya ngereja pengawa nya endang beruntak bendar,” ku Mamat.
Seiku agi orang ba menua nya ke semina deka dikangau enggau nama Leman, urung 40 taun, madahka diri irau nangika Bujang Seblak nambahka dengah iya.
“Seagi-agi baya nya ngemeranka batang ari tu, seagi nya mih iya deka ngiga dengah. Ari nya tadi anang ngumbai orang ke ngemeranka pengidup begigaka pemakai ba sungai tu enda betapi enggau penusah sereta berindik ari nya nyawa mensia tentu enda likun.
“Enggau nya kitai ngarapka opis ke bekuasa ulih mantu rayat ba kandang menua tu ngambika pengidup sida bela likun, nyamai sereta lantang baka orang bukai maya begigaka pemakai,” ku Leman.