KUALA LUMPUR: Ketuai Sekretari Opis Menteri Ngetan Menua Datuk Seri Ismail Ahmad madahka timpuh Progrem Pematih Gawaka Bansa (PLKN) ke diatu ti dipejalaika pengelama tiga bulan, enda dilanjarka berindik ari penanggul belanja.
Kelimpah ari nya ku iya, perintah mega irau timpuh ti dilanjar ulih nekul pelatih ke deka nampung pelajar sereta sida ti udah bekerja.
“Dipelabaka jemah ila (timpuh pengawa pematih) engka deka berubah,” ku iya madah ngagai pemberita pengudah bejadika bup ‘The Malaysia National Service Experience’, ti ditulis pelatih PLKN, Gan Jing Ye, ditu kemari.
Bulan nyin kemari, Opis Pematih Gawaka Bansa (MLKN) diriput madahka latih (PLKN) tetap dipejalaika tiga bulan taja pen bisi perambu ari mensia mayuh ti minta timpuh nya dilanjarka lama agi.
Berebak enggau tu MLKN nenduka atur ngagai pelatih ke bisi ati deka nyambung latih sida.
Ngenang pelatih ti dijil ketegal enda ngriput diri sereta penerang silik, Ismail madahka taja pen pekara nya bisi dalam ‘Akta Latihan Khidmat Negara’ 2003, tang nyentukka diatu nadai seiku pelatih udah ditinggang ukum nya.
“Perintah seruran meri peluang ngagai sida ti meri penerang ke silik ketegal ti enda ulih ngripot diri. Enti deka nampung latih baru, sida patut meri surat lalu latih sida deka ditangguhka dulu,” ku iya.
Nambahka nya, Gan, 21, ngarapka bup ti ditulis iya maya ke nerima latih PLKN ba Kem Sri Impian Sungai Bakap, Seberang Perai, Pulau Pinang taun 2008 ulih ngubah sekeda runding orang ti nyangka program PLKN nadai tuju.
Ku iya bup ti bisi 250 lambar dipelabaka dijual belabuh minggu baru ba kedai bup serata menua, ngena rega RM20 siti. — Bernama