PENGHULU BARU: Sylvester Entri nyerahka Setipikit Nyadi Penghulu ngagai Nyadang lalu diperatika Anthonio Katti Galis (empat kanan) enggau Joseph Belayong (tiga kanan).
MARUDI: Menteri Muda Perengkaguna (Bekal Ai) Sylvester Entri Muran ngelalau bala tuai raban bansa enggau Tuai Rumah (TR) (pelilih menua Marudi) ngambika suah agi ngelawa Opis Pelilih Menua tauka Opis Pelilih Mit.
Iya ti nyadi Menteri Muda Pemansang Tanah madahka pengabis nadai sekali sebulan bala tuai raban bansa enggau TR betemu sereta berandau enggau pemesai ba opis nya bekaul pekara ti nyadi ba rumah panjai.
Kebuah pia ku iya, laban bala tuai tu sebagi ari orang ti gawa ba opis perintah ti nyadika penyambung rayat kena ngenataika penanggul sereta pekara ngagai bala pemesai.
“Tuai raban bansa enggau TR pengabis nadai sekali sebulan betemu sereta berandau enggau bala pemesai sekalika ba Opis Pelilih Menua tauka Opis pelilih Mit bekaul enggau penanggul ke nyadi ba rumah panjai. “Tanggung pengawa tuai raban bansa enggau TR tu ukai semina mutarka orang ti charut enggau penanggul ruang bilik, tang mega mai sereta merambu pemansang ti patut dipejalaika ba menua ngagai opis nya.
Entri mansutka penemu iya ba pengawa ngerami Ngadang Rengkang ti udah dichirika nyadi Penghulu ke diatur ba Rumah Panjai TR. Embam Siam ba Sg Sebubu, Tinjar malam ensanus. Iya ngarapka rayat rumah panjai ulih meri kerejasama ngagai tuai raban bansa enggau TR.
Berebak enggau tu Entri ngelalau rayat rumah panjai nya ngambika enda mudah digeruga ulih raban ti ngenggaika pemansang sereta polisi perintah, kelebih agi ti bekaul enggau Tanah Adat Bansa Asal (NCR).
Sama ngulu pengerami nya Pegawai Pelilih Baram, Joseph Belayong, SAO Louis Michael Balau enggau Penghulu Engah Nuga.