Image from file
THE secret of successful journalism is to make your readers so angry they will write half your paper for you – C.E.M Joad.
Segenteran ayat ke ditulis C.E.M Joad di atas nya ngenang pendiau enggau tapi pengawa raban pengarang berita ke nyelai ari gaya pengidup mensia bukai. Kebuah pia laban sida mudah pegari tang jampat mega kena bantah. Tang ku C.E.M Joad, pengarang berita ke mujur nya iya ke ulih ngasuh bala pemacha iya ringat tauka gidan ati ari utai ke ditulis iya. Taja pan pia, pengarang berita ukai sengaja beniat deka ngemedis ati sapa-sapa tang semina mansutka utai ti diasaika patut dibacha bala mayuh tang tepulai mega ngagai siku-siku pemacha ke udah tentu jarang ulih puas. Minggu tu kitai begulai enggau siku penanyi ke sebedau tu popular enggau lagu Menaul Ganas, Ferron Giang.
Asal & Penatai
Firaon Anak Joseph Giang tauka nama glamour iya Ferron Giang datai ari Kampung Sungai Raya, Temiang Simunjan. Nitihka periuk asi enggau sarung diri, Ferron Giang diatu ngentapka pendiau diri di Rumah Binjamin Angki, Rantau Kemiding Kanowit, Sibu. Ferron Giang ke rindu bemain bol, sepak takraw enggau nyumai mega madahka diri diatu gawa ba Opis Kereja Raya (JKR) Sibu.
Album
“Aku terubah ngerikut album dalam taun 1995 suba. Sekeda ari kompeni ti kala endur aku ngerikut nya Golden Pearl di Kuching, TBC, LUH enggau SY di Sibu. Aku mega begulai enggau mayuh komposer, pemuzik enggau penerbit baka sida Romsey Owen, Ganing Asan, Jackson Dana enggau Achan. Lalu ba album aku ke pemadu baru tu – Bujang Rumah Panjai, muzik digaga Ricky Jay enggau Achan. Kelimpah ari sida nya, sekeda lagu ba album aku endang digaga aku empu”, ku Ferron Giang becherita pasal album enggau iya empu ke nyadi komposer.
Muzik & Artis Dayak Diatu
Ba ruang Pemerindang, tanya tu tetap ayan ninting minggu. Kebuah pia laban kitai deka nemu gaya pengerembai enggau pemansang industri muzik Dayak ari kacha mata artis empu. Ngenang muzik Dayak maya ke diatu, Ferron Giang madah, “ Muzik ke bisi ba album artis Dayak maya ke diatu nyau majak manah. Enda aku luba-luba enti madahka iya nyau ka sebaka enggau muzik artis di Semenanjung. Ari segi tusun muzik, perengka muzik enggau gaya tebah gitar mega udah jauh manah. Kebuah pia jangka aku laban mayuh pemuzik kitai udah kala begulai gawa enggau artis Semenanjung tauka kala bemain ba kelab malam tauka pub din. Ari nya sida tau bulih skil, peneleba enggau mayuh macham penemu ke dibai sida pulai ke Sarawak”.
Aku mega besetuju enggau komen Ferron Giang nya. Ari segi tusun muzik enggau gitaris di Sarawak tu udah tau dikumbai setanding enggau pemuzik Semenanjung. Sekeda ari gitaris ke tebilang ke selalu nyadi pemuzik album nya nyengkaum Walter Sela, Naen, West Overload, Cami Tan, Ricky Jay, Hilary, Jackson Dana enggau mayuh ke bukai ke enda ulih sebut aku ditu. Ba aku, sida tu patut diberi puji (credits) laban bala peninga semina rindu ati ninga muzik ke chukup manah ba album artis tang enda nemu sapa pemuzik nya ke bendar.
Aku agi ingat amat ke randau aku enggau gitaris tebilang Walter Sela setaun dua ke udah ke bekenangka mayuh isu ba industri muzik Dayak nyeng-kaum nama kebuah kitai enda ngadaka anugerah kediri ngagai raban pemuzik album tu lebuh kitai ke ngatur anugerah muzik ba maya ke dudi ila. Aku madah, penemu iya nya endang manah sereta patut laban kualiti enggau populariti siti-siti album ukai semina bepanggai ba penanyi tang pemuzik mega orang ke chukup beguna.
Mutar ngagai pengidup artis Dayak maya ke diatu, Ferron Giang madahka raban artis patut bendar ngenyemakka diri enggau media. “Enti bisi peluang, guna mih media naka ke bisi; enda milih media chelak tauka media elektronik. Nya mih siti ari jalai ti tau dikena kitai “promosi” diri”, Ferron Giang meransang pangan artis iya ke bukai.
Aku suah besemaka artis Sememanjung ke lebih benasit ari kitai ditu laban sida udah dulu begunaka televisyen dikena ngelakuka diri. Kitai di Sarawak semina bepanggai ba radio enggau suratberita tang nya pan bedau chukup laban ukai semua ke bepeluang ayan tauka ulih pansut ba nya. Taja pan pia, diatu nyangka udah betambah mayuh chara enggau endur kitai ulih ngayanka diri kelebih agi nengah YouTube enggau Facebook. Ba aku, enda tentu masuk akal enti artis kitai bedau ngembuan facebook, email tauka agi enda nemu muka YouTube kediri (jaku dikena meransang bala artis). Kebuah pia, laban nya mih chara ke pemadu mudah sereta murah dikena ngayanka diri lalu tambah mega iya enda begunaka ungkus ke besai.
Nama Utai Ti Patut Ditambah Ba Artis Dayak
“Ukai kitai sengaja bebandingka artis Dayak enggau artis Semenanjung. Enggai tauka ka, kitai enda ulih enda meda sereta neladan sida ke udah dulu maju. Siti ari pengelebih sida di Semenanjung nya sida udah bisi pengurus tauka menijar ke diri empu. Menijar nya mih ke ngurus enggau ngatur pengawa tauka ngiga peluang ke artis ke dijaga iya. Ba aku, menijar sigi chukup beguna laban siku artis enda ulih ngereja utai kelalu mayuh ba siti-siti timpuh maya. Enti kitai udah bisi menija kediri, nya tau bendar mantu ba pengawa kitai ke nyadi artis”, ku Ferron Giang ngenang penimpang ke agi bisi dipeda iya ba artis Dayak.
Gosip
Ditanya senentang gosip, Ferron Giang madahka gosip mai dua iti reti. Gosip ke manah tauka betul tau mai pemanah ngagai artis tang enti gosip nya mapap tauka enda betul, iya tau ngelabuhka artis nya. “Ba sekeda artis ke bisi bedengki enggau pangan diri, aku minta sida ulih begulai manah enggau pangan diri. Kebuah pia laban rita kitai ke bedengki nya tau endar ngerusak pemanah nama dunya artis tauka artis nya empu. Aku arapka industri muzik Dayak penuh enggau artis ke mereti sereta manah ati”, Ferron Giang meri komen pasal gosip enggau perangai sekeda artis.
Pesan Ngagai Pemacha Utusan Borneo
Ferron Giang ke irau enggau pengawa chelak rumpak, meri besai terima kasih ngagai bala peminat enggau orang ti nyukung pengawa iya ngelamatu. “Pengujung tu aku bela meransang pangan artis ngambika sama bela ngaga lagu enggau muzik ke manah. Nya siti chara kitai ngangkatka industri muzik Dayak. Anang enda ingatka artis veteran laban sida tentu mayuh penemu enggau peneleba. Nadai salah kitai betanya tauka bekunsi penemu enggau sida laban enti nadai artis lama tentu industri muzik kitai deka sunyi. Reti nya, artis tetap artis tang iya ke biak patut bebasaka sida ke tuai lalu sida ketuai patut meri tunjuk ajar enggau lalau ke betul”, ku Ferron Giang ngujungka randau kami duai.
Sebedau nyurutka diri, Ferron Giang besemaya deka datai ke Kuching baru laban deka ngisi pom masuk nyadi kaban DAMA. Arapka album Bujang Rumah Panjai diterima peminat lagu Iban sebaka mega enggau album Menaul Ganas ke chukup dikerinduka aku.