Orang menua pesisir enda tau enda bebendar agi gawa kena ngangkat tikas pengidup: Joseph Salang
JULAU: Orang bumai bekebun di menua pesisir enda tau enda bebendar gawa ngulihka asil ke mayuh agi ninting hari, ku Sapit Menteri Pemadah, Penyambung enggau Main Asal Datuk Joseph Salang Gandum.
Ku iya, sida enda tau semina tepantup ati ngulihka asil ti semina chukup diempa aja.
“Punaska ulah ti ngulihka asil semina chukup diempa aja, tang patut regas agi gawa kena nambahka asil ngambika penatai pemisi pan nambah,” ku iya lebuh ti betemu sereja bejaku ba Rumah Mambang anak Kana 30 pintu di Sungai Lingah, ditu malam ensanus.
Salang ke nyadi Kaban Parlimen Julau madahka, enti asil ari pengawa bumai majak manah, tambah enggau pengawa nangkal getah ditangkanka enggau pengawa nanam sawit ngambika pemisi kita majak mayuh lalu tikas pengidup pan majak manah.
Ku iya, taja pan perintah ngelama tu seruran deka nulung sida nengah program projek mit pemansang menua pesisir, tang nya ukai pekara ke mudah.
“Perint ah besai udah tetemuka dua bengkah chara, iya nya naman getah bekebun mit enggau nanam sawit. Nya alai rayat patut ngerebut peluang nya lalu anang betangguh agi,” ku iya.
Kelimpah ari nya, iya mega berasai gaga endar ati laban mayuh endar orang ba Pakan ngenataika peminta naman sawit nengah iya lebuh ke betemu apin lama ti udah. Urung 600 iku bisi ngenataika peminta.
Ku iya, ngemeranka pengawa bekebun sawit enggau chara mit deka nguntungka baka ti udah dikereja sekeda orang. Untung beresi ninting bulan sida manggai ba RM10,000 tauka lebih.
Ku Salang, beguna amat enti sida minta lalau ari Gerempung Sawit Malaysia (MPOB) bekaul enggau pengawa baru tu.
Ku iya, keterubah endar MPOB deka nyendiaka 300 iti anak benih sereta baja enggau pechuma enti peminta sida dikemendarka.
Sapit menteri nya madahka nadai jalai muntang enti deka mujur kelimpah ari ti gawa enggau bebendar ngulihka asil. — Bernama