ABANG JOHARI
Abang Johari ngelempaika ngagai ketuai parti ngaga pemutus perambu ngemaduka TPBN2 ari raban BN Sabah enggau Sarawak
KUCHING: Perintah Barisan Nasional (BN) nengeri nadai bejurai sereta berunding pekara bekaul enggau langgur nempa penuduk Sapit Chairman BN Kedua tauka Timbalan Presiden Barisan Nasional Kedua (TPBN2), ti dipaduka entara parti komponen BN ari Sabah enggau Sarawak, pia ku Menteri Dagang Temuai enggau Pesaka Tuai Datuk Amar Abang Johari Tun Openg.
Lebuh dikerandau pengarang berita kemari iya ti nyadi Menteri Pengawa Berumah enggau Pemansang Kandang Nengeri madahka, perintah nengeri diatu lebih ngemeratka pengawa pemansang menua.
Taja pia ku iya, semua pemutus bekaul enggau pekara nya (penuduk Sapit Chairman BN Kedua) bepanggai ngagai pemesai BN ngemutuska nya.
Tambah mega iya ti nyadi Kaban Kunsil Nengeri Satok madahka nya ukai pekara ti berumban dikereja, tang enti udah datai ba maya iya patut bisi pangkat nya, kitai bepanggai ngagai ketuai ba renggat atas ngaga pemutus.
“Perambu ti minta numbuhka penuduk Sapit Chairman BN Kedua nya, kitai ngawakka sida ketuai ba renggat atas BN ngaga pemutus sereta berundingka pekara nya.
“Ba aku, diatu kitai patut meri fokus ngagai penyerakup menua ngambika Malaysia ulih nyingkang nyadi menua ti mansang sereta lantang,” ku Abang Johari.
Iya nyaut pekara nya lebuh ditanya bekaul enggau langgur ti minta pangkat Sapit Chairman BN Kedua ke dipilih ari parti komponen BN Sabah tauka Sarawak.
Dulu ari tu iya ngulu pengerami Konvokesyen Institut Kemahiran Mara (IKM) Kuching, ditu, pagi kemari.
Kelimpah ari nya, lebuh ditanya bekaul portfolio Menteri Dagang Temuai enggau Pesaka Tuai ke dipegai iya diatu, sekalika pengudah ubah baru dalam kabinet ke deka diatur minggu tu, portfolio mengkang dipegai iya tauka orang bukai, Abang Johari madahka: “Nya nganti pemutus ari Kepala Menteri (Pehin Sri Abdul taib Mahmud)”.
Nambahka nya lebuh dipinta meri penemu bekaul enggau penyarut ke nyadi entara PAS enggau DAP, iya madahka pekara nya patut diputarka entara sida.
“Nya pekara DAP enggau PAS, lalu nadai bekaul enggau kitai (BN),” ku Abang Johari.