KUCHING: Perintah nengeri Sarawak enda nikika bayar lisin ngagai kompeni pemansang pengawa berumah baka ke dipejalaika perintah besai menua ba semenanjung.
Menteri Pengawa Berumah Datuk Amar Abang Johari Tun Abang Openg madahka atur nya nda deka dikerembaika ngagai Sarawak ketegal nengeri tu ngembuan atur berumah kediri empu.
“Sarawak ngembuan atur pengawa kediri empu lebuh bejalaika atur berumah ke udah dikemeranka kitai ngelamatu.
“Atur pengawa berumah baru alai lisin kompeni begaga ke rumah ditikika udah dipejalaika perintah besai ba semenanjung nya enda deka dikerembaika ngagai Sarawak,” ku iya.
Iya mansutka jaku tu ba siti aum pengarang berita sepengudah bejadika ‘Sarawak Builders Expo 2011’ (Sarbex) ba Borneo Convention Centre Kuching (BCCK) ditu, kemari.
Iya mega madahka perintah nengeri benung berunding deka ngaga ubah ba pekara ‘Housing Developers (control and licencing) Ordinance 1993 ketegal udah enda setipak agi enggau atur pemansang maya ke diatu.
“Nengah atur ‘Polisi Pengawa Berumah Menua’ pengawa ngaga ubah ba ordinan nya deka ngambi kira raban orang ke megai saham enggau gerempung bukai ke bisi kaul ngambika tau ngemanahka industri berumah menua tu,” ku iya.
Perintah nengeri ngelai pengulih ke dikenataika industri tu ngagai ekonomi menua tajapan ungkus bejalaika dagang tu nyau majak niki, tandu iya,
Ku iya, industri tu ukai semina numbuhka pengawa dagang begagaka rumah tang mega ngenataika penguntung ngagai orang dagang ba pengawa pengangkut(transportation),dagang temuai sereta nyendiakka pengawa puang.
Johari ke mega Menteri Dagang Temuai ngelalau raban orang ke bisi kaul enggau industri begaga ke rumah seruran ngemeratka konsep bejimatka kuasa enggau numbuhka ‘Green teknologi’ ba pelin ke digaga sida iya.
“Numbuhka Green Teknologi enggau Green Building Indek (GBI) ke udah dipinta perintah menua Malaysia nya siti kelai pengawa ngintu pemanah rampa menua enggau angin seruran dikemeratka tajapan atur pemansang enda putus dipejalaika.
“Aku minta raban orang ba pengawa berumah nitihka jaku tangkan ari perintah besai tu ngambika kitai tau ngintu tikas pengangat ke disepi enggau manah sereta enda ngerusak rampa menua,” ku iya.
SARBEX siti pengawa ngayanka perengka ba pengawa begagaka rumah ke diatur ninting taun raban ‘Sarawak Housing and Real Estate Developers Association (SHEDA).
Sama bisi datai ba pengerami nya Presiden SHEDA Zaidi Ahmad, Chairman Pengatur Pengawa SARBEX Dr. Richard Tan, Penyanding Penemu SHEDA Dato William Wei enggau orang bukai.