AUM MUJUR: Andrew (tiga kanan) nerima tanda kenang ari Kandou sepengudah bejadika aum besai PIBG SMK Bawang Assan, kilah ensanus. Bela bisi ayan, (ari kiba) Richard, Jeffery, James enggau Embark.
Pekara tu diasaika rayat rumah panjai Bawang Assan, Tanjung Bekakap, Apong, Melanggan, sekula sekondari enggau primari Bawang Assan
SIBU: Gerempung Apai Indai enggau Pengajar (PIBG) Sekolah Menengah (SMK) Bawang Assan ngembuan pengandal ke besai ngagai perintah menua mutarka penanggul ai paip ti ditapi sida ba Bawang Assan ditu.
Chairman PIBG SMK Bawang Assan, Embark Tani madahka, penusah ai paip ti enda kuat bela mai penanggul ngagai nembiak sekula ke diau ba buding, kelimpah ari rayat ba Bawang Assan, Tanjung Bekakap, Apong enggau Melanggan.
“Penusah tu balat nanggul nembiak sekula lebih agi maya pagi hari enggau malam laban ai paip semina berupai mimit pansut,” pia ku iya maya bejaku ba aum besai ninting taun (AGM) PIBG SMK Bawang Assan, kilah ensanus.
Aum tu dipejadika Sekretari Politik Kepala Menteri, Andrew Shilling Banggit ti ngarika Menteri Kunsil Perintah Menua enggau Pemansang Raban Bansa, Dato Sri Wong Soon Koh.
Ku Embark nandu baru, urung 500 iku nembiak SMK Bawang Assan lalu ukai semina nya aja, bala nembiak SK Bawang Assan mega bela ngasaika penanggul nya.
“Aku ngarika apai indai enggau bala ke diau ba menua tu, ngarap bendar perintah lebih agi pengari rayat kami ditu ulih begigaka chara dikena mutar penusah (kurang ai) ti ditapi kami ari suba tu,” ku iya madahka baru.
Ngelansa enggau silik agi pekara nya, Andrew madah penusah nya endang segi bisi nyadi ba menua nya lalu tu ukai penanggul ke baru nyadi.
Ku iya, penanggul tu udah dibai iya ngagai pengari rayat menua nya, (Dato Sri Wong) enggau Opis Ai Sibu (LAS).
“Aku bisi dipadah paip ai ke diatu deka diganti enggau ke besai agi nyerumba penyampau tubuh betambah mayuh maya hari tu.
“Kitai ngarapka mensia mayuh ba menua tu ngembuan ati sabar nganti projek nya dipejalaika,” pia ku iya sambil nambah iya ngarapka projek nya ulih ditembuka ba taun 2012 ila.
Lalu ba jaku iya maya aum nya, Andrew madah PIBG nyadika jematan apai indai nembiak enggau sekula, kelimpah ari bejalaika tanggung pengawa ke besai ngagai pemansang pelajar nembiak sekula.
Iya andal 85 iku nembiak sekula nya bulih pemutus ke badas ba Penilaian Menengah Rendah (PMR) ti deka dipejalaika kena hari Dua (4 Okt) ti deka datai.
“Anang rawan sereta takut. Asaika peresa nya siti penguji ngagai kitai iya ke enda tau enda bulih pemutus ke manah,” ku iya sambil madah nembiak mega meseti nyempulang diri enggau pemerani.
Bela bisi datai maya tu baka, Penghulu James Semilan, Penghulu Richard Ampi, Penghulu Jeffery Sut enggau Kepala Pengajar SMK Bawang Assan, Kandou Ngadi.