MARUDI: Pengerami Regata Baram Marudi 2011 tau disempamaka baka lubuk emas ngagai mensia mayuh ba genturung menua nya laban ke meri peluang ngagai sida ngulihka penguntung nengah pengawa bejual sepemanjai pengerami nya diatur berengkah ari 28 September nyin kemari nyentukka malam ensanus.
Kelimpah ari nya, nengah pengerami nya mega udah meri awak ngagai mensia mayuh ti diau ba kandang menua Baram mantaika produk sida lebih agi ari asil pengelandik jari. Ku seiku orang dagang, Aminah Resat, 43, Regata Baram muka awak ngagai iya bejual sereta ngelakuka mayuh macham asil pengelandik jari baka bakul buluh enggau rutan ti digaga iya empu.
Sebulan sebedau pengerami regata nya diatur, iya udah nyendiaka diri sereta ngasilka mayuh macham asil pengelandik jari, laban bepelasarka peneleba sebedau tu, peminta asil pengelandik jari manah amat.
“Genap kali pengerami regata diaturkan, aku nadai muai peluang bejual laban ari nya tadi ulih ngenataika penguntung ke besai enti dibandingka enggau hari ke bukai. Kelimpah ari nya aku mega ulih bekelala enggau orang dagang ke bukai nyengkaum sida ti madahka pengerindu diri nyaup iya nyual asil pengelandik jari iya nya ,” ku iya.
Lebuh ke ditanya penyampau ti diulih iya besesahari sepemanjai pengerami nya, Aminah madahka penguntung ti diulih iya nyangka manggai RM1,000 sehari.
Theresa Laeng, 38, ke sama bejualka macham bengkah tepa enggau ngepan asal raban bansa Kayan enggau Iban teulihka penguntung lebih RM1,000 sehari .
“Bisi maya kami balat endar kiruh enti bala orang ke bebeli udah datai lebih agi muaka lemai hari.
“Nasit bisi laki enggau anak aku nulung genap kali enggau bejual maya yang regata tu diatur,” ku iya.
Antara produk bukai ti laku ti dijual iya baka perengka lama raban bansa Iban enggau Kayan kelimpah ari tepa ti digaga ari manik enggau rutan.
Nyerumba pengerami nya, nyauka 200 iti palan endur bejualka mayuh macham produk asil pengelandik jari, gari, pemakai enggau servis bisi dibuka ba pasar Marudi sepemanjai pengerami nya.