SETIPIKIT KE TEPA: Taib (kiba) nyuaka setipikit ngagai Linggi (kanan) sepengudah nyuaka perengka lama niang Tun Jugah ke bela diperatika Daresah (tengah).
Ngambika sida ingatka ketuai raban bansa ke pegari kelia, ku Daresah
KUCHING: Rayat menua tu, lebih agi rebak baru patut ngingatka ketuai lama raban bansa ke pegari ti mayuh berambun nyawa ketegal beratka pengelikun, pengelantang enggau penyenang menua.
Sapit Ketuai Direktor Arkib Negara Malaysia Daresah Ismail madahka pengelantag enggau penyenang ti diasai kemaya hari tu ukai datai muntang.
Nya alai kena ngiri pengerindu sereta nambahka penemu rayat lebih agi rabak baru, dia Arkib Negara Malaysia ngatur program dikena ngingatka ketuai raban bansa ke pegari dulu menya, ku iya.
“Progrem ngingatka ketuai raban bansa ke pegari kelia dikena ngiri penyayau rayat menua tu ngagai sida ti udah berambun nyawa ketegal beratka menua.
“Rayat patut nemu, penyenang enggau pengelantang ti diasaika kitai seharitu asil ari penyakah enggau pemerinsa ketuai dulu kelia,” ku iya.
Daresah mansutka penerang iya ba jaku pengelalu Progrem Ngingatka Ketuai Raban Bansa ke Pegari: Tun Datuk Patinggi Tan Sri Temenggong Jugah Barieng ke diatur Arkib Negara Malaysia begulai enggau Pustaka Negeri Sarawak sereta Yayasan Tun Jugah.
Progrem ngingatka ketuai raban bansa sekali tu ngenang niang Tun Jugah ti mayuh mai pemansang rama, politik enggau ekonomi Sarawak ti berengkah ari penumbuh Malaysia begulai enggau nengeri Persekutuan Tanah Melayu, Sabah, Sarawak enggau Singapore kena 16 September 1963 nyentukka seput iya abis.
“Berindik ari pemar ketuai ke dulu suba, kitai patut ngaku penyakah niang Tun Jugah ba pengawa politik enggau gaya idup orang Sarawak.
“Tun Jugah seiku orang ti meri buah runding ngagai bansa Iban bekaul enggau penumbuh Malaysia kena 16 September 1963 ke lalu nyadi, meri besai reti ngagai semua rayat nengeri tu,” ku iya.
Nitihka penerang Daresah, program ngingatka ketuai raban bansa baka tu deka diatur belama Arkib Negara Malaysia ti nyengkaum semua ketuai ke pegari ba menua Malaysai ke besai baka niang Tun Abdul Rahman Putra, niang Tun Abdul Razak, niang Tun Hussein Onn, niang Tun V.T Sambanthan, niang Tun Tan Cheng Lock sereta sekeda ketuai raban bansa ke bukai.
Dulu ari tu, progrem ke sebaka diatur ba Kedah kena ngingatka niang Tunku Abdul Rahman, Perak (ngingatka niang Tun Abdul Razak), Johor (ngingatka niang Tun Hussein Onn) lalu ba Melaka kena ngingatka niang Tun Tan Cheng Lock.
Kena 7 ngagai 9 Julai tu tadi, Progrem Ngingatka niang Tun Abdul Razak diatur ba Universiti Teknologi Mara pampang Pahang.
Nyerumba progrem ngingatka niang Tun Jugah mayuh bengkah pengerami diatur iya nya pengawa pemandang bekaul enggau niang Tun Jugah, Malam Pentarama enggau Bicara Tokoh.
“Ngarapka ari mayuh macham pengerami tu rayat ulih ngerapitka kaul ti enda ngira bansa sereta taluk ke menua setipak enggau juluk ati perintah nyaguka penegap 1Malaysia,” ku iya.
Ba program nya kemari, Pustaka Negeri Sarawak enggau Yayasan Tun Jugah bisi nyuaka barang lama bekaul enggau niang Tun Jugah ngagai Arkib Negara Malaysia ngambika dijaga sereta disimpan lalu ulih dipandangka ngagai mensia mayuh.
Progrem ti dipenyadika Kepala Menteri Pehin Sri Abdul Taib Mahmud ke disepulang bini iya Puan Sri Ragad Kurdi Taib digulu Sapit Kepala Menteri Datuk Patinggi Tan Sri Alfred Jabu Numpang enggau Dato Sri Empiang Jabu, Menteri Pemansang Tanah Tan Sri Dr James Jemut Masing, Tan Sri Datuk Amar Leonard Linggi Tun Jugah enggau pemesai opis perintah ke bukai.