Thursday, February 2

Pengiruh raban Bidayuh bela disepi ngemansangka Kapit

0

MASING

NANTA

KAPIT: Menteri Pemansang Tanah Tan Sri Dr James Masing begulai engagu Kaban Parlimen Kapit Datuk Alexander Nanta Linggi ngenataika terima kasih ngagai komuniti Bidayuh ti sama kiruh ngemansangka pelilih Kapit.

Seduai ti nyadi temuai ke dipebasa ba Malam Mesra Bidayuh (Ngarum Rami Bidayuh) ti diatur ba Dewan Sri Balleh, ditu malam ensanus.

Pengerami nya diatur Serakup Dayak Bidayuh (DBNA) Pampang Kapit.

“Raban ijinsi perintah ti gawa ba Kapit udah mujur bejalaika tanggung pengawa sida.

“Kapit diatu majak asil kerejasama ari kita semua, ke bisi gawa ditu,” ku Masing.

Kelimpah ari nya, penuduk residen Kapit kala dipegai dua iku bansa Bidayuh, iya nya Michael Sawing lalu kediatu Dahim Nadot, ku iya

“ Nambahka nya Pemesai Pelilih Mit Menua ke diatu, Simon Japut Tiok pan bansa Bidayuh ke lalu nyadi pemesai pelilih mit menua ti pemadu lama gawa ba Kapit.

“Baka nya mega sida ke gawa nyadi pengajar, ba Opis Pengerai enggau polis. Aku meri besai terima kasih ngagai kita laban ti deka gawa ba menua Kapit,” ku iya.

Nyerumba pengerami nya, iya meri belanja RM5,000 ngagai DBNA Kapit, ngambika bisi dikena sida bejalaika mayuh bengkah pengawa bukai sepemanjai taun.

Berebak enggau nya mega, Alexander madahka, taja pan Bidayuh raban bansa minoriti ba Kapit tang penatai sida tetap diasaika kitai.

“Aku arap kita semua terus gawa enggau manah ngemansangka pelilih Kapit lalu kami meri terima kasih ngagai kita semua,” ku iya.

Alexander mega bisi meri belanja RM10,000 ngagai DBNA Kapit.

Chairman DBNA Pampang Kapit Greg Banti madahka, tuju pengerami nya diatur ngambika bisi endur begelumu enggau semua raban serakup nya, kelimpah nyempilka kaul enggau pangan diri.

Sama bisi datai ngulu pengerami nya Residen Kapit Dahim Nadot, ke lalu nyadi penyanding penemu DBNA Kapit enggau Pemesai Opis Pelilih Mit Menua Kapit Simon Japut Tiok.