KUCHING: ‘Web Accessability’ siti ari inisiatif ke bisi lambar laman web digaga diungkupka ngagai sida ke timpang pendiau ngambika muntang ngulih penemu sereta ulih ‘berandau’ enggau laman web nya.
Presiden, National Council for the Blind Malaysia, Dato S. Kulasegaran madah sida ke buta, orang tuai, tauka orang ke timpang pendiau (OKU) entara orang ke ngembuan pengelandik.
“Laman web nyadi sebengkah pekara ke berat dalam pendiau kitai tiap-tiap hari, dataika kitai enda ulih berunding bakani ku gaya pendiau kitai enti nadai penyambung baka tu,” ku iya.
Iya madah baka tu lebuh bejaku ba atur pengawa, ‘Seminar Web Accessability 2011’ ke ngena rambai jaku ‘Making the Web Accessable to Everyone’ ke dipenyadika Menteri Pengintu Pengelantang, Orang Indu enggau Pemansang Ruang Bilik ba Hotel Grand Margherita ditu, kemari.
Peminta masuk ngagai institusi pelajar, ngiga pengawa, ngaga visa enggau sekeda pekara bukai mayuh ngena laman web, nyengkaum bebayarka bil.
Ku Kulasegaran, enda semua sida ke ada buta deka buta belama laban diatu 80 persin ari penyakit nya ulih diperubat, tang kelebih agi begunaka bantu sereta sukung ari orang mayuh kena ngemajuka sida.
“Lapan puluh persin ari penyakit buta tu ulih ditagang tauka ulih diubat, nya beirta ke manah. Tang enda mayuh orang nemu pasal pekara tu. Nya alai, udah nyadi tanggung pengawa kitai ngerembaika berita tu,” ku iya.
Kelimpah ari nya, ku Kulasegaran, enti kitai enda engkebut, nya deka mai penusah ngagai orang buta ke baka nagang sida tu ari ngena pemansang nengah komputer.
“Penyakit buta tu ukai reti semua utai jenuh aja, tang bisi pengarap ati ba sida ke buta ngambika ulih mansang baka orang ke meda,” ku iya.
Entara penerang ke patut ditemu mensia mayuh pasal penyakit buta tu iya nya, 80 persin sida ke kena penyakit tu ulih ditagang, tauka diperubat, 90 persin orang buta diau ba menua ke mansang, dalam dunya kemayahari tu mayuh sida ke buta tu ketegal ‘uncorrected refractive errors’ lalu penyakit rabun mata nyadi pemun orang nyadi buta, 65 persin sida ke buta tu berumur 50 taun ke atas, taja pan mensia mayuh ke dalam umur tu semina 20 persin aja dalam dunya tu, entara penyakit ke ulih ngujungka orang buta baka penyakit rabun mata, glaukoma, sereta penuai umur.
Tang taja pia, diatu sida ke kena penyakit mata mayuh udah kurang dalam kandang 20 taun tu ke udah.
Ke Wilson Entaya, 23, ari Simunjan madahka iya belabuh enda meda lebuh mata iya bisi berasai rabun mimit, lalu ngujungka kededua piak mata iya enda ulih meda agi.
Tang taja pia, nembiak tu madahka pemisi ‘Web Accessability’ ke orang buta diatu siti pemansang ke manah kelebih agi ku iya, sida pan baka orang bukai sama deka bekenaka perengka guna internet.
Lebuh di tanya, maya ngelawa laman web, lambar siti ni ke seruran di ‘peda’ iya, Wilson, bisi pengerindu ngelawa laman rama Facebook laban mayuh pangan ke ulih enggau berandau.
Kulasegaran lebuh ditanya pasal sistem ke dikena orang buta ba komputer, ku iya” :Sistem nya dikangau enggau nama ‘Screen Reader’ ke ulih mantu orang buta nya nengah munyi nyawa.
“Enti nuan meda set komputer nya, nuan mendingka nyawa munyi orang bejaku, munyi nyawa orang nya deka madah ngagai orang buta nya utai ke dipeda sida iya.
“Munyi siti pekara ke berat ba orang buta. Laban sida iya deka nimbal munyi nya lalu ulih ngulihka penemu pasal utai ke nyadi ngelingi sida iya ari bunyi. Nya alai, bunyi nya beguna laban nya ke ngiring orang buta,” ku iya.
Tang enti sema bisi gambar, sistem tu deka nyalin gambar nya nengah ‘audio description’.
Dalam Malaysia, ku Kulasegaran, pemayuh palan orang buta ke bisi komputer dipasang enggau sistem ‘Screen Reader’ nyangka umbas iya pemayuh nyengkaum ba Gerempung Orang Buta Sarawak, sama udah ngembuan ‘Screen Reader’.
Lebuh ditanya pemayuh orang buta ke landik dalam bidang IT, ku Kulasegaran: “Enda mayuh. Enti ngambi penyampau pupu rata, nyangka kurang ari 10 persin.
“Nya alai kami begunaka bantu orang mayuh, perintah, swasta mantu palan kami enggau komputer ke digaga diungkup ke orang buta serata menua.
“Ba penyampau komputer ke udah dipasang enggau ‘Screen Reader’ enda mayuh orang buta ke teulihka penguntung ari pelajar nya. Nyangka laban rega komputer ke udah bisi ‘Screen Reader’ nya kelalu mar, dalam urung RM12 ribu siti unit, tang ngarapka perintah tauka swasa deka mantu gerempung tu,” ku iya.