NGERANDANG PALAN PEMANDANG: Maglin (kanan)bejalai ngagai palan pemandang ti disempulang Direktor Besai Opis Pemadah Malaysia Ibrahim Abdul Rahman (kiba) sereta Konsulate Republik China ba Sarawak Li Shugang (tengah).
KUCHING: Berindik ari ASEAN (Association of Southeast Asia Nations) ke udah ditumbuhka pengelama empat puluh empat taun, pengelantang enggau penegap menua Asia Tenggara udah ngemansangka menua kitai sereta menua-menua ke berimbai, enda ngira pekara politik enggau domestik.
Sapit Menteri Pemadah, Penyambung enggau Main Asal Senator Datuk Maglin Dennis D’Cruz madahka berengkah ari ASEAN dikemansang, ASEAN dipilih ngemeratka bidang sosio-ekonomi.
“Pemansang sosio-ekonomi entara menua ASEAN engka enda sebaka, tang ulih dikempit tauka diserakupka enggau mayuh macham inisiatif.
“Ambika banding nengah ASEAN Free Trade Area (AFTA) ti ngemendarka tiga menua ASEAN iya nya Combadia, Loas enggau Myanmar begulai enggau menua ASEAN ke bukai ngemajuka gerempung ti nyungkakka tikas ekonomi raban bansa.
“Penegap enggau gaya menua ba ASEAN mega sebengkah ari kebuah kitai ulih meransang kompeni menua tasik beranakka puku ba kandang rantau tu,” ku iya.
Maglin bejaku munyi nya lebuh ngemunka “At photo Asean-China Exhibition 2011” ke diatur Opis Pemadah Malaysia ba Kompleks Dagang Temuai Sarawak ditu, kemari.
Ba pengerami nya iya madahka ASEAN Plus Three ngerapitka kaul menua dalam gerempung (ASEAN) ba bengkah pengerami ti diatur begulai enggau China, Jepun sereta Republik Korea.
Kelimpah ari nya, inisiatif bukai baka ASEAN-EU begulai enggau menua Eropah sereta Australia/New Zealand.
Gerempung ti nadai kaul enggau politik tu (ASEAN) ditumbuhka kena 8 Ogos 1967 nengah Deklarasi Bangkok ti dipunka Malaysia, Indonesia, Filipina, Singapura enggau Thailand.
Tuju gerempung tu ditumbuhka kena nyungkak tikas ekonomi sereta negapka pengelikun enggau pengelantang menua Asia Tenggara.
Diatu bisi 10 menua ba Asia Tenggara ke masuk ASEAN ti nyengkaum Brunei, Vietnam, Laos, Myanmar enggau Kemboja.
Semua menua nya beserakup ba pengawa politik enggau pengelikun, ekonomi sereta sosio-budaya enggau mujur ngetanka penegap kelimpah ti nyadi menua pemadu mansang sereta landik besemekih ba dunya.
Malaysia sebengkah menua ti ngepunka ASEAN ke chukup komited sereta bebendar nyapai juluk enggau Wawasan 2020 ASEAN.