Pengerembai internet timpang tegal penyelai rampa menua

0

NGEREMBAIKA TEKNOLOGI PENYAMBUNG: Pemesai enggau raban ari RTM begambar ambi ke kenang begulai enggau Salang (tengah). Bela bisi ayan Mauh (empat kanan).

SIBU: Pemesai enggau gaya rampa menua ba Sarawak enggau Sabah nyadi batang penanggul pengerembai teknologi penyambung (jalur lebar) ba kededua nengeri tu.

Sapit Menteri Pemadah, Komunikasi enggau Main Asal, Datuk Joseph Salang Gandum madah, tikas bungkur internet (jalur lebar) ba dua bengkah nengeri tu agi mengkang ari baruh 50 persin.

“Ketegal pekara nya, teknologi penyambung agi ba tikas ke baruh dikena ba nengeri tu,” pia ku iya madah.

Salang mantaika jaku nya maya betemu enggau pengarang berita sepengudah bejadika Karnival Jalur Lebar 1Malaysia ba Dataran Bandar Sibu Fasa II.

Nyentuk ke 19 Oktober 2011, Kelantan, Pahang, Sabah enggau Sarawak ngembuan tikas bekenaka internet baruh 50 persin nyentukka ujung taun tu.

“Perintah mega ngembuan juluk deka meda teknologi tu ngerembai ngagai 75 persin nitihka ruang bilik serata nengeri ujung taun 2015 bebida enggau 62 persin naka ke diatu.

Beduduk ari pekara nya, Kaban Parlimen Julau tu mega madahka, perintah nengah Opis Menteri Pemadah, Komunikasi enggai Main Asal chakah deka ngerembaika pekara bekena teknologi penyambung baka nengah chara meri komputer binching ngagai rayat.

“Naka ke diatu, perintah udah mujur meri 167,000 unit komputer binching 1Malaysia tauka 16.7 persin ari penyampau ke bendar 1 miliun unit diberi ba serata nengeri,” ku iya nerangka.

Nitih ku Salang, 114 tiang penerima telekomunikasi deka digaga ngambika ulih nyediaka teknologi penyambung sereta disadang tembu tengan taun deka datai.

“Tiang telekomunikasi tu disempulang enggau servis 3G lalu deka digaga ba kandang mengeri enggau menua pesisir Sarawak.

“Kitai ukai semina bekiraka pemayuh penyampau bekenaka komputer nitihka ruang bilik tang mega ngira tikas pemayuh bekenaka tenologi penyambung ngena gadjet,” ku iya madahka baru.

Ku iya nandu, opis menteri begulai enggau SKMM merambu numbuhka 3,100 Palan Jalur Lebar Komuniti (PJK) enti dibida enggau 1,000 PJK ke diatu ba serata nengeri.

“PJK siti program pematih modal mensia ungkup mensia mayuh ti mega sebengkah ari promosi bekenaka teknologi tu,” pia ku iya.

Bela bisi nyempulang Salang ngulu pengerami tu iya nya Kaban Kunsil Nengeri (ADUN) Tamin Joseph Mauh Ikeh enggau Residen Sibu Sim Kok Kee.