Rayat ngelingi kandang nya deka lantang agi enseput

0

MASIR KUJAT

Semua penanggul bekaul enggau bank deka teputar enggau penumbuh Terminal Pos BSN ba Lachau ila

SRI AMAN: Rayat ba sitak Parlimen Sri Aman lebih agi ba menua pesisir dipelabaka nadai penanggul mutarka pengawa ti bekaul enggau bank enda lama agi.

Terminal Pos Bank Simpanan Nasional (BSN) ba Lachau Food Corner ke diempu Pengulu Lee Tong Seng, ba pasar Lachau, Pantu deka nyadi palan endur nyendiaka servis nya.

Kaban Parlimen Sri Aman Masir Kujat madahka, penanggul nya deka teputar enti Bank Simpanan Nasional (BSN) udah maduka enam iku ijin bejalaika servis nya ba sekeda endur kandang menua Pantu, Simunjan enggau Betong berengkah ari kemari.

Lima ari enam ijin ti udah dipaduka ba kandang Pasar Lachau (Keranggas Gayau), Pasar Pantu, simpang jalai nuju ke Simunjan (kedai Pengulu Augustine), Pasar Sebuyau enggau Pasar Maludam, ku iya.

Ku iya, nya sebengkah ari inisiatif ti diperambu Menteri Datuk Seri Najib Tun Razak ngambika mensia mayuh ulih bekenaka perengka bank ari baruh NKRA.

“Tu deka ngemudahka rayat ba menua pesisir ngaduka pengawa ti bekaul enggau bank ngambika sida enda ibuh nurun ke pasar besai,” ku iya lebuh ti berandau enggau pemberita sepenembu bejadika pengerami nya.

Ku iya, ngena perengka nya mensia mayuh tau enda ibuh nurun ngagai pasar besai bebayarka bil karan enggau ai lalu bala penerima bantu pengelantang pendiau ulih nerima wang nengah bank BSN tu.

Taja pia Terminal Pos BSN ti nguna sistem transaksi enda bewayar nya diatu benung diuji, ku iya.