SITI NOR HAJAR
BINTULU: Raban polis enggau penyelamat agi besemekih nulung begigaka Siti Nor Hajar Mohd Rashidi ke beumur enam taun ti diriputka lenyau kena lemai Hari Minggu tu tadi.
Kepala Polis Bintulu, Madang Usat lebuh dikerandau pengarang berita nengah telefon madahka, pengawa begiga anak mit nya agi benung dipejalaika sepengudah diketuka urung pukul 6 lemai Hari Satu empai lama tu tadi.
“Naka ke diatu aku enggai mayuh utai sangka tang semina meras agi ba pengawa begiga sereta nyelamat ke anam mit nya ba genturung menua besemak enggau palan nembiak nya lenyau.
“Pengawa begiga sigi enda diketuka ngapa semadi meh raban polis udah mujur tetemuka penerang tauka bukti ke engkeman bekaul enggau kes tu,”pia ku Madang bejaku seraya deka ngelawa rumah anak mit nya ba Kampung Baru Laut betanyaka pekara ke bendar bekaul enggau penusah nya nyadi.
Nitihka penerang ti dipansutka ba Utusan Borneo ensanus, Siti Nor Hajar Mohd Rashidi diriputka lenyau sepengudah main enggau bala bakih iya ba Kampung Baru Laut kena lemai Hari Minggu.
Siti sebedau lenyau dipadahka bisi mesan ngasuh indai iya bebelika buah rambutan.
Berindik enggau nya, indai Siti, Suriana Yunus, 27, madahka, kepenudi iya meda Siti iya nya urung pukul 2.30 lemai lalu nadai bisi nunjukka ulah ke nyelai sereta selalu mesan bebelika barang pemakai.
Nambahka nya, Suriana minta bantu mensia mayuh ke ngelala tauka tepedaka anak iya nya tau betelefon ngagai iya ba lumur 013-8480265 tauka Mohd Rashidi (014-5978414) tauka ngelawa ngagai balai polis ke semak.
Beduduk enggau nya, pengawa begigaka Siti Nor Hajar nerima saup ari raban Polis Diraja Malaysia (PDRM), Opis Pengerara Api enggau Penyah Penusah (BOMBA), Pasukan Gerakan Marin (PGM) enggau raban ti bukai.